Pearson ban Moyes-a'n mak a ti

West Ham boss David Moyes chuan Watford-in an coach Nigel Pearson an ban chu mak a tih thu a sawi a, match hnih chauh khelh tur an la neih laia ban tawk coach hi 'Coach of the Year'-a thlan tlak a nih zawk thu a sawi. 

Moyes chuan, "Watford-in Pearson an ban hi mak ka ti takzet. Watford hian Premier League an khelh chhunzawm a nih ngat chuan Pearson-a'n a enkawl tirha an dinhmun nen ngaihtuahin coach ṭha bera thlan tlak a ni zawk hial a ni," a ti. 

Kum 56 mi Pearson-a'n Watford a enkawl tirh khan Premier League mawngphah an luah a, match 15 an khelhah vawi khat chiah an chak - Pearson hian a league match hmasa paliah vawi thum hnehna a chang a, February thla tawp lamah khan tlawm la nei lo Liverpool chu 3-0 a hnehin relegation zone an chhuah san. Moyes chuan, "Watford hian eng nge an beisei ber pawh ka hre lo. Pearson-a'n a zawm tirh khan an dinhmun a chhe em em a, point ruk laiin 17-na an thlau. Relegation zone aṭangin a hruai chhuak a, an thutlukna hi a na mah mah a ni," a ti. 

Watford hian Pearson an ban hnua an match hmasa ber chu Thawhlehni zan khan an khel a, Manchester City lakah 4-0 ngawtin an mualpho. Hornets hian Pearson an ban hma hian Javi Gracia leh Quique Sanchez Flores an ban tawh bawk a, tun season-ah coach pathum an ban tawh tihna a ni! League Managers Association hotupa Richard Bevan pawhin, "Manager ṭha tak tana thu lawmawm lo tak a ni," tiin Pearson ban a ni chu mak a tih thu a sawi ve bawk.