AFC an chak zel; Electric a la thim!

Zote Honda MPL9-ah Aizawl FC-in nimin tlai khan Electric Veng FC 1-0 an hneh a, I League club hi match thum khelh tawhah an la chak vekin league hmahruaitu an ni.

RG Stadium-a inkhelah hian MPL champion lai tan Hmangaihkima'n lehlam tihsual zarzoin goal awm chhun a khung a, AFC forward MS Dawngliana chu man of the match-ah an thlang.

Tawnhriat nei ṭha
Aizawl FC-in bul ṭantu zingah Zodingliana Ralte leh Immanuel Lalṭhazuala-te an dahlut a, tawnhriat nei player pahnih hi tlarhnungah captain Lalchhawnkima hoin an awm.

Tlarhmaah coach Lalrozama Fanai chuan MS Dawngliana a rawn dah a, Aizawl FC squad chhahzia a lang. Chutihrualin Electric Veng hian midfield-ah talent nei ṭha pathum - Vanlalremkima, H. Zawnhmingthanga leh Larry Lalrinawma te an hmang thei bawk.

Goal khat chauh
Aizawl FC-in nung takin inkhel bul an ṭan a, ding lam aṭanga Zuala cross chu Dawngtea'n tauh goal mah se offside vangin pawm a ni lo.

I League club an khel ṭha zui a, vei lam aṭangin Jeremy Laldinpuia'n ṭha takin a lalut a, a ball cross ṭha bik chu Dawngtea'n goal-ah pet mah se keeper C. Vanlalhriata'n ṭha takin a dang.

Electric Veng an insiamrem a, team pahnih an inhnehtawk. Aizawl FC tlarhnung tibuai tur khawpin EFC an nawr na lo a, chutih rualin an I League club pawhin Electric Veng tlarhnung tan harsatna an siam thei ta bik lo.

Minute 35-naah erawh Electric Vengin tlarhnungah ball an in-pass kual rei hret a, an tisual - ball chhuhsaktu R. Lalthanmawia'n (Amawia) rang takin Hmangaihkima pein Tuithiang tlangval hian mawi zetin goal kilah a 'push' lut. First half-ah 1-0 a ni.

A goal belh lo
Second half-ah goal mamawh Electric Vengin bench lamah game thlak danglam thei tur player an neih loh avangin an goal bawh a na lo.

Aizawl FC goal nawr a na hret a, Dawngtea'n ṭum hnih goal khung theihna hun ṭha a bawhpelh.

I League club squad a chhah a, bench aṭangin Chhanhima Sailo, Joseph Vanlalhruaia leh Augustine Lalrochama te an luhtir a, inkhel chawhnu lamah game nghet zawk an khelh theih phah.

Amaherawhchu Aizawl FC-in goal an khung belh miau loh avangin hun tawp thlengin EFC-in beiseina an nei a, I League club-in nuamsain hun tawp an khar bik lo.

Electric an la chak lo zel a, uiawm takin an chak lo chiah chiah zel a; Aizawl FC erawh ropui taka khel bik lo chungin an chak zel thung - player ṭha neih a lang.

Aizawl FC 1 - 0 Electric Veng FC
AFC : Hmangaihkima 35'
MoM : MS Dawngliana, AFC