Arsenal defender Zinchenko a inhliam

Premier League hmahruaitu Arsenal chuan Pathianni tlai dar 4:30 hian league match khel turin Brentford an lenchilh dawn a, mahse, Mikel Arteta hnuaia player pawimawh, left-back Oleksandr Zinchenko chu hliam vangin a inlan theih a rinawm lo.

Ukrainian FA chuan an ram player pawimawh hi training-naah a inhliam thu an sawi a, international break-ah ram tan a inlan theih loh tur thu an puang - Arsenal tan pawh a inlan thei dawn lo tihna a ni.

Gunners hian beisei phak baka ṭhain season an hmang a, an league match hmasa pangaah hnehna an chang vek - mahse, match hnuhnung berah Manchester United an ngam lo a, Old Trafford-ah 3-1 in an tlawm.

Queen Elizabeth thihna avangin Arsenal hian United an hmachhawn hnua an hmachhawn tur, Everton (league) leh PSV Eindhoven (Europa League) te chu an la hmachhawn lo a, inkhelh hun sawn a ni.

Hemi a nih avangin hian United laka an tlawm hnuah match an la nei leh lo - Brentford laka insiamṭhat an beisei lai takin Zinchenko a inhliam a, Gunners fans tan thu hriat nuam a ni lo ang.

Ukrainian FA chuan, "Zinchenko hian club-ah training a neih laiin, a chawn puarah hliam a tuar a, dam turin kar hnih vel a mamawh dawn. Oleksandr hian a inhliam rualin Ukrainian national team head coach Oleksandr Petrakov chu phone-a biain a hriattir nghal a, a dam thuai kan duhsak a ni," an ti.

He thu buatsaih a nih lai hian Arsenal chuan an player inhliam chungchangah thuchhuah siam an la nei lo a, Brentford a hmachhawn theih loh bakah, karleh international break-a Scotland leh Armenia hmachhawn tur Ukraine team-ah a tel thei lo ang.

Ukraine hian Nations League-ah Scotland chu international break chhungin vawi hnih an hmachhawn ang a, Scotland nena an inkhel karah hian Armenia nen an intawng dawn bawk a ni.

Pound maktaduai 30 man Zinchenko hian Arsenal a pan hnuah inelna hrang hrangah match nga a khel tawh a, assist vawi khat a nei bawk - August thla khan a khup hliam vangin Fulham leh Aston Villa a hmachhawn thei tawh lo bawk.

Ukrainian defender awm loh hlanin Kieran Tierney chuan Arsenal-a a hmun ruak a lo hnawh khat theiin a rinawm. Hetihlai hian Arsenal-in chanchin lawmawm hriat tur an nei a, August-a a hliam avanga match li zet inlan lo tawh Thomas Partey chuan team training a zawm leh tawh.

Pathianni tlaia Arsenal-in an lenchilh tur Brentford hian league match hnuhnung berah Leeds United chu 5-2 in an hneh a, an 'puja' fuh lai tak a nih avangin chetsual theihna an ni.