Wolves khelmualah Manchester City

Champions League-a 2-1 a Borussia Dortmund ngamtu Manchester City chuan vawiin tlai dar 5:00 hian league match an khel dawn a, Wolverhampton Wanderers an lenchilh dawn.

Vawiin tlai team pahnih intawng tur hian ngaihven hlawh chhan a nei - Diego Costa chuan Wolves a zawm thar a, Spain international inkhel hi mipuiin hmuh an châk.

Wolves hi September 10 zana Liverpool nena an inkhel tur sawn a nih avangin September 3 hnuah an inkhel leh tawh lo a, hetihlai hian City erawh Champions League khel chau hlim an ni.

Hello Costa
Wolves-in nipui transfer-ah beiseina sang tak nen VfB Stuttgart striker Sasa Kalajdzic an lalut a, mahse, match khat chiah a khel hman tihin a inhliam a, Raul Jimenez chu hliam vangin a chawl mek bawk.

Hei vang hian club nei lo Costa lam an hawi - kum 33 mi striker hian Chelsea tan season thum chhung Premier League-a lo khel tawh a, league match 89-ah goal 52 khungsakin, vawi hnih champion nomawi a chawipui.

Chelsea a chhuahsan hnuah Costa hian Atletico Madrid leh Atletico Mineiro tan khel leh tawh mah se ngai a awh leh tawh lo a, Wolves-ah a theihna pholan a duh dawn - chutihrual chuan team a zawmna a la rei loh avangin bul a ṭan nghal lo a nih pawhin a mak lo ang.

City beiseina
Manchester City-in league match ruk an khelh tawhah tlawm an la nei lo a, mahse, vawi li chiah chakin vawi hnih draw an nei - hei bakah hian Crystal Palace laka an chak ṭum pawhin 2-0 in an hnufual hman a, an tlarhnung a phui lo rih hle.

Pep Guardiola naute hian an league match hnuhnung berah Aston Villa chu 1-1 in an inhnehtawkpui bawk a, inkhel en chuan an vannei tel tih an hai lo ang. City hian CL-ah harsa takin Borussia Dortmund an hneh zui a, an chau!

Hetihlai hian an khingpui tur Wolves erawh kar hnih dawn inkhel lo tawh an ni a, City aiin chawlhna hun an ngah zawk - hei tak hi Manchester khaw club tan a harsat phahin a rinawm.

Thawnthu hlui
Premier League-ah Wolves leh City hi vawi 16 an intawng tawh a, City-in vawi 10 hnehna an chan tawh laiin, Wolves erawh vawi li an chak a, vawi hnih an inhnehtawk - 2019-20 season khan City hi Wolves nena an intawn vawi hnihah an tlawm ve ve!

Mahse, an intawn hnuhnung vawi liah City an chak vek thung a, an goal khung belhkhawm pawh 13-3 a ni. Chutihrual chuan Wolves-in league-a City an hneh tawhna match lia match thum hi Molineux-a an chak a ni a, zaninah an mualah hian an inlan dawn.

Zanina zawhna langsar ber erawh, Pep Guardiola hian sa huai serin Erling Haaland leh Kevin De Bruyne te bul a ṭantir dawn nge, a chawlh hahdamtir dawn tih chu a ni a, tlarhnunga Aymeric Laporte la awm lo hi Costa-a'n a rawn chhawr nghal thei ang em, tih pawh a chhanna hriat châkawm tak a ni ta.