Ronaldo-a'n goal a khung ve leh ta

Tun season-a match sarih zet goal khung loa a awm hnuin Cristiano Ronaldo chuan goal a khung ve leh ta a, Europa League-ah Manchester United chu 2-0 in hnehna a chanpui.

English club hian khualmualah Sheriff Tiraspol chu 2-0 in an hneh a, Jadon Sancho chuan minute 17-naah goal hmahruai khungin, Ronaldo hian penalty aṭangin a khung ve leh a ni.

Manchester United hian match hmasa berah Real Sociedad chu 1-0 in an ngam lo a, match hnihnaah an insiamṭhat lehnghal avangin Red Devils fan-te an thaw huai ang.

Red Devils hi Leeds United nena an inkhel tur chu sawn a ni a, kartawpah league match khelh tur an nei lo - international break-in a zui dawn avangin October 2-ah an inlan leh chauh dawn a ni.

Hello Southgate
England manager Gareth Southgate-a'n Nations League-a Italy leh Germany hmachhawn tur squad a puang a, Sancho tan hmun a awm lo - mahse, English forward hian Three Lions tana khelh a phu tih a pholang zui nghal.

Sancho hian minute 17-naah team movement mawi zet a awm hnuah, Christian Eriksen-a siamsak chu goal hmahruai ni turin ṭha zetin a khung a, kum 22 mi forward tan tun season-a goal thum a khungna chiah a ni.

English forward hian goal dang khung belh theihna remchang a nei a, mahse, a khung ngei tura lang chu Sheriff captain Stjepan Radeljic chuan goal line aṭangin a lo pet chhuak hman.

Sancho chuan, "Ram tana koh nih loh chu a hrehawm duh takzet a, mahse, theihtawp ka chhuah chhunzawm ang a, World Cup atan koh ka nih ngei ka beisei," a ti - Sancho hian fan pakhatin shinpad a pek chu lek chhuak chungin a goal khung a lawm.

A hming Ronaldo
Season hmasa nena chhiar tel phei chuan Ronaldo-a'n match riat zet goal khung loin hun a hmang tawh a, Portuguese forward hian season ṭantirah Old Trafford chhuahsan a lo dil zuk bawk si avangin sawiselna a tawk nasa hle.

Mahse, Moldovan club lakah Ronaldo tan hun a inhawng a, defender Patrick Kpozo chuan minute 39-naah Diogo Dalot lakah penalty a chawi - a pet turin Ronaldo a lo chhuak a, a hlah lo. Ronaldo hian goal a khung hma hian penalty a hlawh chhuakah a inngai a, pek a ni lo thung.

Kum 37 mi forward tan tun season-a a goal hmasa ber a nih bakah, Europa League-a a goal hmasa ber a ni bawk a, a career-a club football-a goal 699 a khungna a ni tel nghal bawk.

Goal khung chaka tuihal Ronaldo tan chuan a goal khung hi thawk huaina tham a tling a, chutihrual chuan goal dang khung chhunzawm turin October nghah thlen a ngai dawn - khung zel thei tak maw?