Washington Open an ṭhulh

August 13 aṭanga khelh tur Washington Open chu coronavirus vanga ṭhulh a ni. United States Tennis Association (USTA) chuan US Open erawh ruahman sa anga kaltlang pui an la tum reng thu an sawi ve thung.

Hripui leng avangin March thla hnu lamah tennis inelna pangngai a la awm leh lo. August thla aṭang chuan inelna ṭhenkhat kalpui tum a ni, mahse ruahmanna leh inbuatsaihna duhthusam a awm theih loh avangin Washington Open hi ṭhulh a ngai. Washington Open chairman Mark Ein chuan, "Ram hrang hrang aṭangin player an rawn zin luh a ngai dawn a, hriselna leh himna kawngah inbuatsaihna a felfai hman lo bawk," tiin inelna an neih theih loh chhan a sawi.

Grand Slam zinga mi US Open chu August 31 aṭangin New York khawpuiah khelh tum a la ni reng, a hmunah entu an awm lo ang. US Open hma hian August 15 aṭanga ṭan turin Cincinnati Open chu buatsaih tum a la ni reng bawk.

USTA chuan thuchhuah siamin, "Kan dinna ngaiah nghet takin kan la ding reng a ni," an ti. WTA hnuaia inelna zingah chuan August 3 aṭanga khelh tur Palermo Open chu hri len hnua khelh leh hmasak ber tur a ni ang. Season hmasa khan Australian tlangval Nick Kyrgios chuan US-a tennis inelna pakhat Washington Open-ah hian hlawhtlinna a chang a ni.