Dan theih loh Haaland leh City

Premier League champion Manchester City chuan Wolverhampton Wanderers 3-0 in an sawp a, an striker ṭha bik Erling Haaland chuan goal a khung chhunzawm zel. Jack Grealish leh Phil Foden ten an khung belh bawk.

Pep Guardiola naute hian match sarih aṭangin point 17 an hmu a, nomawi humhim turin an buk a rit hle. Man City dinhmun a ṭha viau, chutih rualin khelh zat inangah Tottenham Hotspur nen an point a inzat - EPL nomawi inchuh a ngaihnawm dawn.

City an vul
Tun season-ah beisei angin Grealish a khel ṭha lo a, Inrinni tlai an inkhelh hmain Guardiola-a'n a chhan ngai khawpin a awm. Molineux Stadium-ah erawh goal khung turin hun a mamawh rei lo, a hun ṭha hmasa ber a hmang ṭangkai nghal.

Inkhel ṭan aṭanga second 55-na lekah English forward hian Kevin de Bruyne-a siamsak a khung a, hnai takah a lo tlawh lut. Minute 16-naah Haaland hun a thleng chhunzawm leh nghal a, box pawn aṭangin a khung.

Bernardo Silva-a ball pek dawngtu Haaland hian a tlan pui thut a, hla deuh tak aṭanga pet chu keeper Jose Sa-a'n a dang phak lo. Chawlhlawk hmain chak tur zawk a chiang tawh a, goal engzat nge City lamin an khung belh ang tih chu zawhna a ni tawh zawk.

Wolves buaina belhchhah turin defender Nathan Collins chu Grealish a tlawh avangin hnawhchhuah a ni a, goal hnih an phurh bawk avangin an tan thawh ngaihna a awm tawh lo, goal tam tak an chhuah zui lo erawh an vannei.

Second half-ah City tan Foden-a'n a khung, striker Haaland-a ball lirh luh chu De Bryune-a'n a cross a, box chhunga awm Foden hian tawih zetin a kheng lut, khualmualah Pep-a hoten nuamsa takin point thum an hmu.

Guardiola a lungawi
Erling Haaland-a'n Manchester City tan inelna hrang hrangah match 10 aṭangin goal 10 a khung der tawh a, season bul an ṭanna hi thla hmasa mai kha a la ni tih hria ila, ani leh goal hi chu sawi hran theih a ni lo.

'Haaland-a'n goal a khung' tih ai chuan, 'Goal a khung lo' tih hi news a la tling zawk hial mai thei! Haaland bakah Grealish rawn che ṭha leh ta chu Guardiola ti lawmtu a ni a, tlarhma lamah rintlak a ngah leh ta sawt.

Guardiola chuan, "Ka player zawng zawngte hi ka hre chiang, ka rin ngam te vek an ni. Jack khan goal a khung bakah a khel ṭha, goal a khung lohna inkhelah pawh player mal leh mal inhmachhawnah chuan a ṭha berte zinga mi a ni reng.

"Striker ṭha tak pahnih kan nei, an hming chu Erling Haaland leh Julian Alvarez te an ni. Bournemouth kan khelh ṭumin an khel dun a, tun ṭumah pawh khelmualah an lut kawp thei tih a takin kan hmu leh, tun aia ṭha zawk pawhin an la khel thei ang," a ti.

Nipui bazarah Raheem Sterling leh Gabriel Jesus te an chhuak a, anni pahnih awm lo mah se Haaland leh Alvarez an neih avangin an buai lo. Season hmasa tawp nena chiar zawmin EPL match 22 chhung tlawm an nei lo, an club record a ni hial.

Costa a la tel lo
Wolves striker ṭha ber chu Raul Jimenez a ni a, a lua hliam na tak a neih hnuah erawh Mexico international hian tun hma a phak thei tawh lo, tun dinhmunah hliam vangin a chawl mek bawk, a hmunruak luah tur an mamawh.

Diego Costa an la lut - Chelsea tana Premier League nomawi vawi hnih chawi tawh hi club nei loa awm lai a ni a, inkhel leh nghal tur chuan a la inpeih lo deuh, a inlan theih loh avangin an tlarhma a hriam lo hle.

Bruno Lage naute hian tun season Premier League match sarih aṭangin goal thum chauh an khung a, fans lamin Costa kha khel nghal tura an beisei pawh kha a mak hran lo, goal khung thei striker an mamawhna a sang takzet.

Wolves manager Lage chuan, "Player 10 ni chunga Man City hmachhawn chu a awlsam lo, kan tih ang baka tih ngaihna kha chu a vang ve khawp ang. Player kima kan khelh laiin tihsual kan nei, ven theih reng aṭangin goal hnih kan chhuah.

"Kim lo kan nih hnua ka naute rilru put hmang kha a ṭha ka ti, match dangah pawh hlauh nei loa kan khelh chhunzawm ka beisei," a ti. International break a awm zui dawn. October thla tira West Ham an hmachhawn hunah chuan Costa a inlan theih tawh a rinawm.