NorthEast champion Mizoram

72nd Senior Nationals NorthEast Basketball Championships-ah Mizoram mipa team chuan an khingpui hneh vekin an champion a, Udaipur-a neih tur Nationals C'ships-ah India hmarchhak ai an awh ang.

Inelna hi September 13-16, 2022 chhung khan Hawla Indoor Stadium-ah neih a ni a, hmeichhe lamah Assam an champion thung. Assam hian an elpui Meghalaya, Mizoram leh Manipur te an hneh vek. Hmeichhe inelnaah hian Meghalaya chu pahnihna niin Mizoram hmeichhe team chu pathumna an ni.

Pakhatna Mizoram
Nikum aṭang khan Nationals Championships khel tur hi zone hmanga zawn ṭan a ni a, Mizoram hian final-ah Assam hnehin an champion. Kuminah NorthEast zone inelna hi Mizoramin a thleng a, inelna kalpui dan an thlak hret.

Pool A-ah champion lai Mizoram bakah Assam leh Nagaland te an awm nghal. Pool B-ah Meghalaya, Manipur, Tripura leh Arunachal Pradesh te an awm a, vawi khat ṭheuh an inkhelh kual hnuah a sang ber hi pool A-a khel turin an tling.

Mizoram hian pool B-a ti ṭha ber Meghalaya chu match hmasa berah 91-51 in an sawp nghal a, Nagaland pawh 93-58 thoin an sawp. Pool B match tawp berah Mizoram hian Assam chu 101 - 64 in an sawp a, NorthEast-a basketball thiam ber an nihna chu an humhim. Mipa inelnaah hian Meghalaya hian Assam leh Nagaland te hnehin pahnihna an ni.

MBBA an lawm
MBBA chuan, "Inelna hlawhtling taka kan buatsaih theih nana min sponsor-tute bakah media partner Zonet, medical partner National Ayush Mission, Mizoram leh Mizoram State Sports Council te chungah kan lawm hle. India hmarchhak state-te an vaiin an rawn kal kim a, an chungah kan lawm hle bawk," tiin thuchhuah an siam.

National Cham-pionships hi kumin kumtawp hian Udaipur, Rajasthan-ah khelh a ni dawn. Inelnaah hian team 16 an tel ang. Inelnaa tel turte chu a thlengtu Rajasthan, North East Zone champion, Railways team leh Services team bakah North, East, South leh West Zone aṭangin team thum ṭheuh an tel dawn a ni.