Saul 'Canelo' Alvarez hmaah Golovkin a tlawm leh ta

Mexican boxer rothap Saul 'Canelo' Alvarez chuan vawi thum an intawna a vawi hnihna turin Gennady Golovkin chu nimin zing khan a hneh leh ta a, round 12 an inhnekah judge pathumten chak zawkah an puang vek.

Las Vegas khawpuia inhnekah hian Alvarez hi 116-112, 115-113, 115-113-a chakah puan a ni a, WBA (Super), WBC, IBF leh WBO super-middleweight title a kawl lai chu a humhim leh ta.

Alvarez chuan, "Ka ṭhian ka lawm e, fan-te tan fight hmuhnawm vawi thum ngawt kan chhawpsak a ni," a ti a, Golovkin chuan, "Canelo nena inchibai hi ka duh a ni. A team-te zawng zawng ka lawmpui a, mi huaisen dik tak a ni - chu chu i hrethiam lo a nih chuan engmah i hrethiam lo ang," tiin Canelo a fak bawk.

Beisei phak lo
Boxer ropui pahnih hi tun hmain vawi thum an lo intawng tawh a, an intawn hmasak berah sawisel theih takin an inhnehtawk - a vawi hnihnaah Alvarez a chak a, a vawi thum nan an intawng nawn.

Kum 32 mi Alvarez-a'n a tir aṭangin inhnek a thunun a, Golovkin-a'n a bei let hleithei lo a ni ber. Mahse, heti chung hian Alvarez-a'n na taka Kazakhstani boxer hnek a thei bik lo a, an intawn hmasakte nena khaikhinin a hmuhnawm lo.

Round riatna a zo a, Golovkin-a trainer Johnathan Banks chuan a boxer chu bei hram hram turin a fuih a, a pu fuihna hi pawmin Golovkin tak tak kan hmu ve ṭan.

Mahse...
Kum 40 mi Golovkin-a'n round hnuhnung lamah theihtawp chhuahin a bei a, mahse, Alvarez-a chau tawh tih lang mah se mipui beisei angin a hnek thei bik lo a, knockout awm loin boxer pahnih inhnek a tawp.

T-Mobile Arena-a inhnekah Alvarez a chak a, vawi 62 fight a hmachhawna vawi 58 hnehna a channa a ni - vawi hnih a tlawm a, vawi hnih draw a nei. A vawi thum nana Golovkin a hmachhawn hma hian light heavyweight-ah chhoin, Dmitry Bivol a hmachhawn a, a chak lo - ama weight dik takah a insiamṭha lehnghal.

Triple G hminglem an pek Golovkin tan erawh vawi 45 fight a hmachhawna vawi hnih a tlawmna a ni a, vawi 42 hnehna changin, vawi khat draw a nei - a draw hi Alvarez nena an inhnek hmasak ber kha a ni.