Foxes ngam loh Sonaldo chu!

Jose Mourinho-a'n Tottenham Hotspur a enkawl lai khan Son Heung-min chu Brazilian striker ropui Ronaldo nena khaikhinin, "Sonaldo" tih hming lem a pe a, kha Sonaldo ngei kha Inrinni zanah hmuh tirin kan awm leh ta.

Tottenham Hotspur chuan an mikhual Leicester City chu 6-2 ngawtin an sawp a, he inkhelah hian bench aṭanga luhtir Son chuan hattrick a siam - a goal khungte hi goal mawi bik vek an ni a, South Korean forward class sanzia hmuhtirn kan awm leh ta.

Spurs tan hian Son bakah Harry Kane, Eric Dier leh Rodrigo Bentancur ten goal khat ṭheuh an khung a, Leicester tana Youri Tielemans (penalty) leh James Maddison goal khung chu mualpho zualpui khuhna chauh a ni.

Antonio Conte enkawl team-in hnehna an chan avangin match sarih aṭanga point 17 hmuin, Manchester City nen an point hmuh zat a inang a, Leicester erawh point khat chiah neiin table mawngphah an luah mek.

An reh ṭhiap a!
Leicester boss Brendan Rodgers tan a hna chelh lai chelh reng turin chak a ṭul tawh a, beisei anga season hmang lo team hian danglamna thlen thei player an neih bawk avangin Spurs tan fimkhur a ṭul.

Mahse, London club an insiamrem hman lo - minute rukna lekah Davinson Sanchez chuan James Justin laka a chet dan ṭul lo tak avangin penalty a chawi a, a pet turin Tielemans a lo pen chhuak.

Belgian striker pet hmasak zawk chu Hugo Lloris chuan dang mah se Tielemans-a'n a pet hmaa a lo tlanchhuah hman avangin pet ṭhat a ni a, a dang nawn tawh lo.

Tottenham khelmual a reh a, mahse, rei lo tak a ni - goal an chhuah aṭanga minute hnih hnu lawkah Kane chuan si phurh sutna goal a khung a, Dier chuan minute 21-naah corner aṭanga ball kal chu a tauh lut bawk.

Sonaldo
Chawlhlawk hman hmain Maddison chuan Foxes si phurh a sut a, English midfielder goal khung hi a mawi takzet. Mahse, Spurs beidawn nan erawh a tawk zo lo - second half ṭan aṭanga minute hnihna lekah Bentancur chuan Spurs tana a goal hmasa ber a khung ve leh a, 3-2 a ni.

Hetihrual hian Leicester an hlauhawm ve reng a, Spurs ngaih a ngam lo. Conte-a'n Richarlison la chhuakin, tun season inelna hrang hranga match riat a khelha goal la khung lo Son a luhtir.

Italian coach-in thutlukna a siam sual lo - Son hian minute 73-naah ṭha zeta ball a lakluh hnuin mawi lutukin tun season-a a goal hmasa ber a khung a, a hawikir tawh lo. Minute 84-na leh 86-naah goal mawi tho a khung leh a, 6-2 in Foxes a chakpui.

Son-a luh hmain Leicester tan Maddison leh Patson Daka chance neih chu Lloris-a'n ṭha zetin a dansak a, Daka-a'n an lama a tih luh chu Leicester keeper Danny Ward laka Sanchez-a lo foul avangin pawm a ni lo bawk.

Rodgers a beidawng lo
Leicester-in league match sarih an khelhah hnehna an la chang miah lo a, vawi 22 ngawt goal chhuah tawhin vawi ruk chiah an la khung - tun season Premier League-a goal chhuah hnem ber an ni mek.

Mahse, Foxes boss Brendan Rodgers chuan a la beidawn loh thu sawiin, "He harsatna hi kan paltlang thei ang tih ka ring reng ṭhin. Ka player-te khan inrintawkna an tlakchham lohzia hmuh turin a awm a, chu chu thil ṭha tak a ni.

"Theihtawp ka chhuah zel dawn a, mahse, he game hi ka hrethiam a, a zawna vawi ruk tlawm chu a ṭha thei lo a ni," a ti - Foxes hian October 3-ah an khel leh dawn chauh a, Nottingham Forest an mikhual dawn avangin fans beiseina a sang ang.

Spurs boss Antonio Conte chuan, "Premier League hi chu a harsa a, ka ngaihdanah chuan bul kan la ṭan ve chauh a ni. City, Liverpool leh Chelsea te hi an ṭhain, nomawi tam tak an chawi tawh," a ti a, match saeih aṭangin point 17 nei tawh mah se champion a sawi ri duh lo.