Arsenal hnehtu Villa tan beiseina

Aston Villa-in Premier League beiseina chhi nung turin Thawhlehni zan khan Arsenal 1-0 in an hneh a, goal awmchhun hi minute 27-naa Trezequet a khung a ni. Villa-in relegation zone an chhuahsan theih nan inkhel dangah Manchester City-in 4-0 in Watford an sawp.

Premier League-ah match khat chauh khelh tur a awm tawh a, relegate tur a la chiang lo. Norwich City an relegate tawh a, club pathum Bournemouth, Watford leh Aston Villa aṭangin pahnih an la tla leh dawn.

Aston Villa-in Arsenal hi an hneh meuh lo, Villa Park-ah phei chuan John Gregory hnuaia December 1998-a an hneh kha an hneh hnuhnun ber a ni. Amaherawhchu Premier League-a inham tang tur chuan thil thleng zen zen loh an thlentir a ngai.

Villa Park-ah Covid-19 vangin inkhel entu an awm lo a, inkhel pawimawh dan erawh a ngai reng. Minute 27-naah Conor Hourihane-a'n corner a pet a, Tyrong Mings-a'n tauh pialin vengtu nei lo Trezeguet-a'n a awl awmchhunah a volley goal.

Kum 25 mi Egyptian midfielder hian Covid-19 hnuah goal thum a khung a, Arsenal lama goal awmchhun a khung bakah Crystal Palace 2-0 a an hneh ṭuma goal hnih a khung bawk avangin Villa tan a ṭangkai hle. Arsenal-in ball chang tam mah se goal zawnah an pet lo. Chutihrualin Pierre-Emerick Aubameyang-a'n chance ṭha a hlah a, Eddie Nketiah-a'n goal ban a tauh per bawk. Chutihrualin Villa an thawkrim a, goal dang khung belhna hun ṭha neiin point thum hlawhchhuah an phu.

Aston Villa manager Dean Smith chuan, "Kan mamawh tak kan hlawh chhuak. Pathiannia West Ham kan hmachhawn hunah pawh kan tih nawn leh ngei a ngai a, tunah chuan kan kutah engkim a awm," tiin a sawi. Villa captain Jack Grealish chuan, "Ka la chiang ngam lo. Chutihrualin tum pakhat kan nei a, chu chu Premier League-a Aston Villa awmtir chhunzawm zel hi a ni a, hei chauh hi ka ngaihtuah chu a ni," tiin him tura theihtawp an chhuah tur thu a sawi.