Friendly match-ah Chelsea an chak

Pathianni zana Chelsea leh Liverpool inkhel tur chu Queen Elizabeth II vuina avangin sawn a ni a, Graham Potter hote erawhin mipui hmuh theih loh turin a club hlui Brighton Hove Albion nen friendly match an nei thung.

Inrinni zan inkhelah hian Chelsea hian Brighton hi 2-1 in an hneh a, Aston Villa aṭanga Stamford Bridge pantu Carney Chukwuemeka-a'n goal hnih a khung. Kum 18 mi Chukwuemeka hi tun season-ah Blues tan a la inlan lo a, friendly match-a a khelh ṭhat avangin khelhna hun ṭha neih phah ngei a rinawm.

Chutihrualin Seagulls nen hian Champions League-a khel te leh ram tana khel tura kohte an inlan lo. Chukwuemeka bakah hian first team-a inlan tam lo Armando Broja, Conor Gallagher, Christian Pulisic, Denis Zakaria leh Trevoh Chalobah te bakah Under 18 player te an inlan a ni.

Chelsea hian league match ruk aṭangin point 10 an hmu a; October 1, Inrinni zan hian Crystal Palace an hmachhawn leh ang.