India ramah MotoGP

Bike intlansiakna sang ber MotoGP chu India ramah an tlan ngei dawn niin a lang ta, tuna ruahmanna an siam dan chuan kum 2023 aṭangin Buddh International Circuit-ah tlan a ni ang - a thu phunga inremna neih tawh niin, ziah fel a ni thuai dawn.

MotoGP sumdawnna lama thuneitu Dorna leh Noida-a innghat intlansiak lam buaipuitu Fairstreet Sports te chuan tun kar chhung hian inremna ziah fel hman an beisei, a hming atan ‘Grand Prix of Bharat’ tih a ni ang.

Buddh International Circuit-ah hian tun hmain Formula I Indian Grand Prix pawh an tlan tawh, mahse sum leh pai bakah chhiah leh sumdawnna chungchangah fel lo a awm avangin chhunzawm theih a ni lo.

Dorna MD Carlos Ezpeleta leh CEO Carmelo Ezpeleta te chu September 21, Nilaini hian India ram khawpui Delhi-ah an lo kal dawn, inremna an ziak a nih chuan, inelna sang leh a hniamte nena chhut kawpin mi 5000 vel bawr tan hna thawh tur an siamsak thei dawn tihna a ni ang.