Goal khung tura khuanu duan LewanGOALski

Bayern Munich lakah goal khung loin Robert Lewandowski vanduai mah se La Liga lamah a hna a thawh chhunzawm lehnghal a, Polish striker hian Inrinni zan khan goal hnih a khung leh ta.

Barcelona hian an mikhual Elche chu 3-0 in an hneh a, Lewy bakah hian Xavi hnuaia hmun chang khat tak Memphis Depay chuan goal khat a khung ve bawk a, Elche-in a chhanletna tur an nei lo - Pedri goal khung erawh video assistant referee rawn a nih hnuah pawm a ni lo.

Catalan club-in hnehna an chan avangin La Liga table chung ber an luah zui a, nizana inlan Real Madrid leh Atletico Madrid inkhel a zirin an dinhmun erawh danglam leh thei a ni.

Bul ṭanna duhawm
Nou Camp-ah Barcelona tan Elche laka chak harsa tura ruat a ni lo a, an hna awlsam sa tih awlsam belhchhah turin, mikhual team captain Gonzalo Verdu chu minute 14-na lekah Lewy laka a foul avangin hnawhchhuah a ni.

Lewy hi goal hmaah a tlang ngei dawn niin a lang tawh a, Verdu hian a tih theih tawp tiin a paw thlu - red card a hmu zui. Barca tan a harsa tawh dawn lo tih a chiang nghal.

Minute 34-naah Alejandro Balde chuan ball a pet phei a, Depay-a'n lo tlawh hman lo mah se Lewandowski chuan harsatna nei loin goal-ah a lo chantir a, 1-0 a ni.

Hei le Depay
Barca-in mikhual team lakah ṭhat chhuah an tum lo - Lewy goal khung tur siamsaktu Balde bawk a inlar a, Depay tan a siamsak. Netherlands international hian amah vengtu Nwankwo Donald bum a, ṭha zeta a virpui hnuah goal a khung a, a thiam a la theihnghilh lo.

Season hmasa lawka Barca pantu Depay hian coach Ronald Koeman ban hnuah Catalan club tan a khel phak meuh lo - Inrinni zan a inlan pawh tun season La Liga-a a inlan vawi hnihna chauh a ni a, Barca tana khel tlak a ni, tih a pholang zui.

Sawi hmaih thiang lo chu assist vawi hnih neitu Balde a ni. Kum 18 mi left back hian tun season-ah league match nga khelin bul a ṭan vek a, assist vawi thum a nei tawh.

Goal khung khawl
Barca-in 2-0 a hma hruai chungin chawlhlawk an hmang a, player pakhata an tam zawk bawk avangin chak tur a chiang tawh - hetiang boruak karah hian Lewy-a'n insum phah a tum lo.

Kum 34 mi striker hian second half ṭan aṭanga minute thumnaah an goal thumna a khung a, tun season match riat a khelh aṭangin goal 11 zet a khung ta - club tharah insiamrem turin hun a mamawh ve lo a ni ber.

Lewy hian season hmasa khan Bayern Munich tan inelna hrang hrangah match 46 khelin goal 50 a khung a, Barcelona-ah hetiang zat hi khung thei tak ang maw? Hunin a hril ang.

Inkhel dang
La Liga inkhel ngaihven hlawh dangah Valencia chuan 3-0 in Celta Vigo an hneh a, Samu Castillejo, Marcos Andre leh Andre Almeida ten goal khat ṭheuh an khung a, Celta hian a chhanletna tur an nei lo.

Mikhual Celta winger Franco Cervi chu Thierry Correia laka a foul avangin red card pek a ni a, kim loa Celta an khelh hian 1-0 chiahin an la hnufual a, player pakhata an tlem zui avangin an tan comeback a harsa tawh.

Athletic Bilbao chuan 3-2 in Rayo Vallecano an hneh bawk. Rayo hian Oscar Trejo hmangin goal hmahruai khung mah se Bilbao tan Inaki Williams, Oihan Sancet leh Nico Williams ten an chhanglet - Inaki leh Nico hi unau an ni a, Rayo tan Radamel Falcao chuan hun pek belhah khung ve leh mah se awmzia a nei phak lo.