Barca hnehtu Bayern-in Augsburg hneh lo

Bundesliga thunun tura beisei Bayern Munich-in beisei an pha lo chhunzawm zel. Julian Nagelsmann-a hote hian Champions League-ah Inter Milan leh Barcelona hneh thei mah se Bundesliga-ah a zawnin match li chhung chak hmel an hmu tawh lo a, Inrinni zan khan khualmualah Augsburg 1-0 in an hneh lo.

Beisei pha lo Bayern
Bundesliga champion lai Bayern Munich-in season bul an ṭan ṭha a, harsatna nei loin nomawi an humhim turah a ngaih theih. Hei chauh hi a ni lo, an striker chhuanvawr Robert Lewandowski awm lo an tuar loah a ngaih theih bawk.

Amaherawhchu Barcelona tan Polish striker Lewandowski-a'n goal a khung chhoh reng laiin Bayern erawhin goal khung an harsat. Bayern hian Bundesliga club vantlang Augsburg lakah goal an khung thei lo a, goalkeeper Rafal Gikiewicz a khel ṭha ve bawk.

Mualneitu tan hian Mergim Berisha chuan minute 59-naah left back Iago siamsak chu goal-ah a chantir a, goal dang a lut tawh lo. Bayern tan Jamal Musiala, Thomas Muller leh Leroy Sane ten chance ṭha an hlah a, hun tawp hma hretin Manuel Neuer ball tauh ṭha zet chu keeper Gikiewicz-a'n a dansak.

FC Augsburg general manager Stefan Reuter chuan, "First half-ah khan hma hruai thei kan ni. Bayern ang team ṭha hneh tur chuan theihna zawng zawng chhuah a ngai a, chutiang tak chuan kan nauten an khel a ni," tiin a sawi.

Augsburg head coach Enrico Maassen chuan, "Bayern hneh tur chuan attack tel a ngai a, hnehna chang turin kan keeper a khel ṭha tel bawk. Kan vannei tel tih chu ka pha lo a, chutihrualin point thum hlawh chhuak turin kan khel ṭha ve bawk a ni," tiin a naute a fak.

Bayern hian Augsburg an hneh loh hma hian Borussia Monchengladbach, Union Berlin leh VfB Stuttgart te nen an inhnehtawk. International break a awm dawn avangin Bavarians hian October thlaah match an nei leh dawn chauh a, October 1-ah Bayer Leverkusen an hmachhawn ang.

Reus a inhliam
Inkhel dangah Borussia Dortmund-in Signal Iduna Park-ah Youssoufa Moukoko goal hmangin Schalke 1-0 in an hneh a, league hmahruaitu an ni. Dortmund hian match sarih aṭangin point 15 an hmu a, Bavarians hian point 12 chauh an hmu thung.

Dortmund hi chak mah se captain Marco Reus a inhliam avangin an lawm a kim lo. Kum 33 mi Reus hi kerek hliam vangin zawn chhuah a ngai a, Qatar-a khelh tur World Cup-ah pawh a inlan thei ang lo ang tih hlauhawm hle.

Reus hi ke rek hliam vang thoin kum 2014-a Germany champion ṭum khan a tel thei lo a, ṭhal (groin) hliam vangin Euro 2016-ah a tel lo. Dortmund captain hian World Cup 2018-ah khel mah se Germany an che ṭha lo a, Euro 2020-ah hahdam a duh avangin a inlan lo bawk.