Tu nge relegate dawn?

Premier League aṭangin club pathum an relegate dawn. Point inang hmu a an awm a nih chuan a hnuaia tarlan hi en dan indawt tur a ni.

1.    Goal Difference (GD): Goal khung zat aṭanga goal chhuah zat paih

2.    Goal For (GF): Goal khung zat

    Point no. 1 leh 2 hmanga chinfel theih a nih loh chuan Head to Head en tur a ni.

3.    Points (Head to Head): Overall-a point inang hmute intum bikna chauh en a ni ang a, chuta point hmu sang chu dah san zawk tur a ni.

4.    Away Goal (Head to Head): Overall-a point inang hmute hi head to head-ah an la intluk zel a nih chuan khualmuala goal khung tam zawk chu dah san zawk an ni ang.

    Point no. 1-4 pawha chinfel theih a nih loh chuan playoff hmangin relegate tur hi chinfel a ni ang.

16. West Ham United

(GF : 47; GA : 60; GD : −13; Pts - 37)

    West Ham United hian nizan khan Manchester United an hmachhawn a, point an hmu a nih chuan an him tawh ang. An chak lo a nih erawh chuan chhiarkawp danin an la him lo thung. Chutihrualin Hammers hi an relegate dawn a nih chuan thilmak a thlen a ngai. David Moyes-a hote hian point 37 an hmu tawh a, an elpui Aston Villa leh Watford aia an goal difference a ṭhat fe zawk avangin an himah a ngaih theih.

    Hammers hian an match hnuhnung berah Aston Villa an hmachhawn dawn a, goal ruk chuanga an chak lohin Villa hnuaiah an awm dawn. Amaherawhchu relegate tur chuan Watford-in goal ruk chuanga Arsenal an sawp a ngaih avangin thil thleng kawp thei a ni lo.

17. Aston Villa

(GF : 40; GA : 66; GD : −26; Pts - 34)

    Aston Villa-in Arsenal an hneh zarah Watford point hmuh zat an hmu a, goal difference hmangin Hornets chungah an awm hram, match 37 khelh zawhah an la him rih. Villa hian an match tawp berah West Ham an hmachhawn dawn a, an elpui ber Watford aiin point an hmu tlem thiang lo. 

    Aston Villa hian West Ham hi goal khatin hneh se, Watford-in Arsenal goal thum china an hneh chuan an tla dawn tho, a chhan chu Hornets hi goal difference-a an chungnun theih vang a ni a. Chutihrualin Villa hian Hornets aiin goal ruk ngawtin an khung tam a, hemi a nih avang hian goal khata Hammers an hneh a, Watford goal hniha an chak chuan 'goal for' hmangin Premier League an khel zel ang.

18. Watford

(GF : 34; GA : 61; GD : −27; Pts - 34)

    Watford-in Manchester City laka goal li ngawt an chhuah a pawi a, match tawp berah Arsenal an hmachhawn dawn bawk avangin Premier League khel zel turin hmabak a ko hle. Hornets goal difference a ṭhat loh avangin match tawp bera an elpui Villa aia point hmuh tam chu Premier League-a an inham tan theih dan a ni ta a, West Ham puihna an mamawh tihna a ni. Chutihrualin relegation battle a ni a, chak an harsat tih chu chiang sa a ni a, an chak lo a nih pawhin goal chhuah tlem a pawimawh ang.

19. Bournemouth

(GF : 37; GA : 64; GD : −27; Pts - 31)

    Bournemouth-in an match tawp berah Everton an hmachhawn dawn a, Premier League khel zel turin Goodison Park-ah chak ngei ngei a ngai. Chutihrualin Cherries hi an chak a nih pawhin EPL-a awm chhunzawm tur chuan Aston Villa leh Watford te an chak loh a ngai a, thil thleng thei a la ni.

20. Norwich City 

(GF : 26; GA : 70; GD : −44; Pts - 21)

    Championship champion ni chunga Premier League in pet tling Norwich City hi tun season-a Premier League 

aṭanga relegate hmasa ber an ni a, season ṭantirh lamah champion lai Manchester City meuh hneh mah se record an nei ṭha chhunzawm lo. Match 37 aṭangin point 21 chauh an hlawh chhuak a, goal 26 khungin goal khung tlem ber an ni a, goal 70 chhuahin goal chhuah tam ber an ni bawk.