Spurs hnuaiah Arsenal

North London club pahnin Arsenal leh Tottenham Hotspur te hi club inhal tak an ni a, Gunners hi Premier League-ah an chungnung zawk. Tottenham chunga an awm tih a chian apiangin Arsenal ṭantuten St Totteringham's Day a hmang ṭhin a, Spurs ṭantute deuh sawhna a ni ber.

Tun season-ah erawh Arsenal chungah Tottenham an awm dawn a, St Totteringham's Day an hmang thei dawn lo. Gunners hian an match hnuhnung berah Watford an khel dawn a, an chak a nih pawhin a sang berah pasarihna an ni thei chauh. Chutihrualin Mikael Arteta hote hian FA Cup final an thleng a, Chelsea an hneh a nih chuan Europa League an khel thei ang.

Tottenham hi 2006/17 season aṭang khan Arsenal chungah an la awm zel a, hei hian Gunners dinhmun a sawifiah. Aston Villa nen an inhmachhawn ṭum hian thlawhtheihnain 'Back Arteta, Kroenke Out' tih a rawn thlawhpui a, Villa Park a rawn hel.

Arsenal manager Mikael Arteta chuan, "League table hi a daw lo. Team dang nen point hmanga kan inthlauhna in hmu ang a, chu chu ka nihna dik tak chu a ni," tiin a sawi. Club neitute chhan zuiin Gunners boss chuan, "Kroenke-a leh a hote, club board leh sporting director ten 100% in  min thlawp a, fan-ten ka sawi hi min pawmpui a ngai," a ti.

FA Cup chungchang sawi langin Arteta chuan, "Europa League kan la khel thei a, chumi tur chuan FA Cup-ah kan champion a ngai a, pressure kan ngah sawt bawk. FA Cup champion turin kan theihna zawng zawng kan chhuah ang," tiin a sawi.