Man City-in Watford an sawp

Manchester City-in FA Cup semifinal-ah Arsenal hneh lo mah se an insiamṭha nghal a, Thawhlehni zan khan Vicarage Road-ah Watford 4-0 zetin an sawp.

City tan hian Raheem Sterling-a'n goal hnih a khung a, Phil Foden leh Aymeric Laporte ten goal khat ve ve an khung bawk. Pep Guardiola hote hi goal nga khung thei an ni a, amaherawhchu injury time-a Gabriel Jesus-a goal khung chu offside vangin pawm a  ni lo.

Tla thei dinhmuna ding Watford-in Man City an hmachhawn hmain manager Nigel Pearson an ban a, tun season-a manager pathum an banna a ni a. City nen hian Under 23 coach Hayden Mullins leh a assistant Graham Stack ten an enkawl a, match tawp bera Arsenal an hmachhawn hunah pawh an kaihruai ang.

Hornets hian Man City hi kawng tinrengin an tluk lo a, ball possession pawh 23% chauh changin goal attempt vawi hnih chauh an nei a, goal zawnah an pet lo. Watford manager lai lawk Hayden Mullin chuan, "City hi team ṭha tak an an ni a, manager pawh an nei ṭha. Team dang tam tak pawhin an khan lo a, kan game plan siam a thawk lo. Arsenal nen ṭha taka khelh kan tum ang," tiin a sawi.