Mbappe-a'n chhuah a tum lo

Kylian Mbappe chuan amah ngaihventu awm ṭhin mah se tun dinhmunah chuan Paris Saint-Germain chhuahsan a tum lo, an ram khawpuiah a hlim tawk thu a sawi - PSG tan thu ngaihthlak nuam a ni ang.

Coronavirus vangin Ligue 1 an khel zo thei lo a, season an hmang zo hma bik. Mbappe hian season kal laiah a club tan inelna hrang hrangah goal 30 a khung tling hman tho, kum 21 mi chauh a la nih avangin club lian tam takin an hnena khel turin an duh.

Nipui bazar hmasa khan Real Madrid nen na taka sawizawm a ni, kuminah Premier League champion Liverpool nen an sawi zawm leh bawk; season tharah erawh PSG tan a la khel zel dawn. France international forward chuan, "Paris-ah hian ka hlim, he hmunah hian hmabak tam tak nei chungin ka lut a, ka hnathawh tur pawh ka la thawk zo lo. PSG tan hian a tam thei ang ber nomawi chawi ka duh, chumi tur chuan theihtawp ka chhuah ang," a ti.

PSG coach Thomas Tuchel pawhin a player duhlai chanchin sawiin, "Kylian hian kan hnenah contract a nei mek a, zawrh lai a ni lo. Theihna nei sang bik tak nena kan thawkho thei hi ka lawm, club dangin an lo it ve pawh hi a mak lo, a ṭha em a ni," tiin a sawi.

PSG hian Ligue 1 nomawi an humhim tawh, French Cup leh League Cup final khelh tur an la nei. Champions League quarterfinal khelh hmabak an la nei bawk, season kal laiah nomawi dang pathum an la beisei mek. Thomas Tuchel-a naute hian match an khel lo rei tawh a, inkhel hautak hmachhawn tur an la neih avangin friendly match an khel ṭhin. Thawhlehni zan khan Celtic nen inhmachhawnin 4-0 in hnehna an chang.