Madrid derby-ah Real Madrid an chak

Pathianni zan khan Madrid derby sawi hlawh tak chu khelh a ni ta a, Real Madrid chuan 2-1 a Atletico Madrid hnehin point thum an hlawh chhuak a, table chung ber an luah leh ta.

Real tan Rodrygo leh Federico Valverde ten goal khat ve ve an khung a, Atletico tana Mario Hermoso goal khungin awmzia a nei phak lo - Hermoso hi hun pek belhah hnawhchhuah a ni bawk.

Carlo Ancelotti nauten league match ruk an khelhah hnehna an la chang vek a, point 18 an nei tawh - an hnuai chiahah Barcelona an awm a, point hnihin an inthlau mek.

Real hian 1987-88 season khan an league match hmasa parukah hnehna an lo chang tawh a, tun season-ah an rawn chhunzawm leh ta chiah - champion rim a nam ṭan nghal der em ni?

Boruak 'hot' chu
Pathianni zana club pahnih an intawn hmain football agent Pedro Bravo chuan Real forward Vinicius Junior chu a lam dan bansan turin a ti a, "Spain-ah chuan khingpuite kan zah tur a ni a, zawngte ang maia lam chin hi bansan a ṭul," a ti!

Hei hi mi tam tak chuan vun rawng vanga inthliarnaah an ngai a, an sawisel nasa hle. Pedro hian a hnuah ngaihdam dilna a tichhuak a, Vinicius hian a lam dan chu bansan a tum loh thu a sawi ve bawk.

Brazilian forward hian, "Ka lam dan an sawisel a, mahse, hetianga lam ṭhin hi keimah chauh ka ni lo. Ronaldinho, Neymar, Lucas Paqueta, Antoine Griezmann, Joao Felix, Matheus Cunha, Brazilian funk singer, samba dancer, Latin reggaeton singer leh American mihangte ta pawh a ni ve.

"Khawvela culture hrang hrang phuar khawmtu lam a ni," a ti a, hetihlai hian Atletico Madrid captain Koke chuan, "A lam loh chu a tan a ṭha zawk ang," tiin Brazilian forward hi a lo vau lawk ve bawk.

An ṭan ta
Inkhelh hma aṭangin boruak a 'hot' tawh a, mipui beisei angin inkhel pawh a nung nghal hle - mualneitu Atletico chu hlauhawm hmasa zawk an ni a, minute 20 pawh a tlin hmain chance an nei nual hman.

Atletico full back Felipe chuan uiawm takin a tauh goal lo a, Yannick Carrasco-a'n a chance neih a chhawr lo a, Geoffrey Kondogbia chuan hla deuh tak aṭangin kawh zetin pet mah se a khung thei bik lo bawk.

Mahse, Atletico-in an chance chhawr theih loh an tuar vat a, minute 18-naah goal an chhuah der - Rodrygo chuan Aurelien Tchouameni hnenah ball a pe a, nipui transfer-a Liverpool aia Real pan thlangtu midfielder hian ṭha zetin penalty box-ah a vawrh lut.

Kum 22 mi Tchouaméni-a ball thlawh luh hi fing taka tlan lut Rodrygo chuan nang leh hmanin goal-ah a chantir a, lam lo tura an vau Vinicius nen lam chungin an goal khung an lawm - boruak chu 'hot' tak a ni ringawt!

A la tawk lo
Atletico an insiamṭha nghal dawn emaw tih laiin Real inkhel a hmuhnawm tawlh tawlh a, minute 36-naah an rawn belhchhah - Vinicius chuan chak zetin ball a tlan luhpui a, khung ngei tum mah se post a pet per.

Mahse, a per lehlam chu Federico Valverde-a'n lo nangchingin goal ruakah a khung a, Atletico tlarhnung an hawihai - minute 40 a tlin hmain Real-in goal hnih an nei der a, Atletico-in a chhanletna an nei lo thung.

Goal hnih an chhuah hnuah Atletico tan Carrasco chuan chance duhawm a nei leh a, mahse, Real keeper Thibaut Courtois zawnah tak a pet avangin a chance neih a chhawr lo.

Atletico khelmualah Real-in 2-0 a hmahruai chungin chawlhlawk an hmang a, Atletico fans tan mahni muala heti zata hnufual hi a 'na' a, second half-ah team thar zawk beisei a ni.

Hero to zero
Atletico boss Diego Simeone-a'n danglamna thlen turin player siksawi a ṭul tih a hria a, Belgian wing back Carrasco la chhuakin Mario Hermoso a luhtir.

Hermoso hian minute 83-naah Antoine Griezmann-a corner aṭanga ball kal chu a tauh lut a, minute sarih a la awm tihin Atletico-in comeback beiseina an nei thar ve leh a, an phur.

Mahse, hun pek belh minute khatnaah Hermoso a chesual zui - Griezmann-a corner pet an channa lamah Dani Ceballos nen an innawr a, yellow card hmuhna tur khawp ni lo mah se Ceballos hi na tih hmel takin a tlu.

Referee-in yellow card vawi khat a lo pek tawh Hermoso a pe nawn a, a hnawt chhuak - player kim loa khel Atletico tan si phurh sut ngaihna a awm tawh lo a, referee dem mah se an thiamawm.

Chak ngei duh squad ka nei a, kan player pawimawh ber Karim Benzema tel loin derby-ah kan chak thei a ni. Hmasawnna tur chu kan la nei ngei a, mahse, hei lo liam hi beisei tur a awm chuang lo. Match kan khelh tawh zawng zawngah kan la chak vek a, anni ang player ka enkawl thei hi ka lawm a ni. - Carlo Ancelotti, Real Madrid boss

Tlarhnunga inrem ṭhap chung a, counter-attack hmanga ṭha zeta min nawr let dan khan Diego Costa kan neih laia kan khelh dan min ti hre chhuak a, khatihlai khan min sawisel nasa hle. Direct game ṭha tak an khel a, tlarhnung aṭanga tlarhmaa ball a thlen phei dan kha rang tak a ni. An nawr na a, awmze nei takin tlarhnung an veng a, an khel ṭha a, an chance neih an chhawr bawk. Madrid coach khan hna ṭha tak a thawk a ni - rang takin min nawr let thei a, talent an nei ṭha em em bawk. - Diego Simeone, Atletico Madrid coach

September 16, Zirtawpni Zan
Real Valladolid 0 - 1 Cadiz
CAD: Álvaro Negredo 90+2'

September 17, Inrinni Zan
Real Mallorca 1 - 0 Almeria
REM: Pablo Maffeo 25'
Barcelona 3 - 0 Elche
BAR: Robert Lewandowski 34', 48'; Memphis Depay 41'
Valencia 3 - 0 Celta Vigo
VAL: Samu Castillejo 37'; Marcos André 82'; André Almeida 90+3'
Athletic Bilbao 3 - 2 Rayo Vallecano
ATH: Inaki Williams 14'; Oihan Sancet 28'; Nico Williams 33'
RAY: Oscar Trejo 5'; Radamel Falcao 80'

September 18, Pathianni Zan
Osasuna 0 - 2 Getafe
GET: Juan Iglesias 30'; Gastón Álvarez 76'
Villarreal 1 - 1 Sevilla
VIL: Alex Baena 51'
SEV: Óliver Torres 8'
Real Betis 2 - 1 Girona
REB: Borja Iglesias 15' (P), 71'
GIR: Arnau Martínez 7'
Real Sociedad 2 - 1 Espanyol
RES: Alexander Sørloth 17'; Brais Méndez 29'
ESP: Edu Expósito 19'
Atletico Madrid 1 - 2 Real Madrid
ATM: Mario Hermoso 83'
REA: Rodrygo 18'; Federico Valverde 36'