Durand Cup-ah Lianzuala top scorer

Asia khawmualpuia football tournament upa ber Durand Cup final chu Pathianni zan khan khelh a ni a, Mizo tlangval Lallianzuala Chhangte leh Lalengmawia (Apuia)telna Mumbai City chuan final-ah Bengaluru chu 2-1 in an ngam lo - Mumbai chak zo lo mah se inelnaa goal sarih khungtu Lianzuala chu top scorer a ni.

Bangalore club tan Sivasakthi Narayanan chuan goal hmahruai khung mah se, Apuia'n Mumbai tan a sut - Vaivakawn tlangval hi Belgium lamah kar hnih chhung training a nei a, a inlan loh reng hnuah final-ah a rawn kir.

Mumbai-in si phurh an sut hnuah beiseina thar nei mah se Brazilian defender Alan Costa chuan an beiseina neih chu a hmeh mihsak a, Bengaluru tan goal khat rawn khung lehin, Sunil Chhetri hoa khel team hian 2-1 in hnehna an chang.

Lianzuala'n goal khung theihna chance vawi hnih nei mah se a chhawr lo a, Lunglei tlangval chuan, "Kan thlen chinah ka lawm viau a, mahse, ka chance neih chhawrin, goal khung ila, lawm a kim lehzual ang.

"Mahse, engtiklai pawha goal khung erawh thil theih a ni bik lo a, Pathian min hruainaah ka lawm a ni," tiin Vanglaini a hrilh a, Lianzuala hian Durand Cup-ah match sarih aṭanga goal sarih khungin, assist vawi thum a nei bawk.

Chennaiyin forward hlui chuan, "Season ṭan hmaa mahnia ka lo tih hram hram rahte kha ka seng ni berin ka hria a, ka lawm takzet a ni," a ti a, a thawhrim rah a seng thei chu a hlim hle - top scorer nih manah hian cheng nuai thum a dawng.

Durand Cup-ah hian Mizo player inlan an awm nual a, inlan zingah Odisha forward Jerry Mawihmingthanga (3 goals), Army Green chhuanvawr PC Lallawmkima (2 goals), Odisha midfielder Isak Vanlalruatfela (1), Rajasthan United striker Lalremsanga (1), Odisha midfielder Issac Vanmalsawma (1) leh Jamshedpur rawlthar Lalruatmawia (1) ten goal an khung.

Lianzuala hian nimin zing khan India camp a zawm lehnghal a, Mizo tlangval tan chawlh hahdam hman a ni lo - India coach Igor Stimac-a'n friendly match khel tura player 23 a koh zingah a tel a, Mizo awmchhun a ni.

India hian vawiinah Kolkata aṭangin Vietnam an pan nghal dawn a, Singapore (September 24) leh Vietnam (September 27) te nen Hung Thinh Friendly Football Tournament-ah an inel dawn a ni.

Team pathum hi an inkhel kual ang a, point hmu sang berin $30,000 (Rs. 23,93,340) dawngin, pahnihnain $20,000 (Rs. 15,95,560) leh pathumnain $10,000 (Rs. 7,97,770) an dawng dawn bawk.