AIFF League Committee Chairman-ah Lalnghinglova Hmar

All India Football Federation Executive Committee meeting chu nimin khan Kolkata-ah neih a ni a, AIFF hnuaia committee hrang hrang enkawltu tur ruat niin Mizoram Football Association honorary secretary Lalnghinglova Hmar (Tetea Hmar) chu AIFF League Committee Chairman atan ruat a ni.

MFA aṭangin mi pathum dang Lalrawngbawla, LV Lalthantluanga leh Lalrengpuia te chu AIFF Committee hrang hrangah telh an ni.

AIFF Executive Committee Member term hnihna hmang mêk Tetea Hmar chu committee pawimawh tak League Committee hotu berah ruat a ni a, I League bakah a hnuaia age group league hrang hrang leh Indian Women's League-te an enkawl ang.

Hetihlai hian MFA assistant secretary Lalrawngbawla chu AIFF Referee Committee Member-ah ruat a ni a; ani hi AIFF match commissioner ni lai a ni. MFA Executive Committee Member LV Lalthantluanga chu AIFF Finance Committee Member-ah ruat a ni a, Lalrengpuia chu AIFF Futsal Committee Member atan ruat a ni bawk.

Hei bakah hian AIFF chuan Arjuna Award dawng thei tur player pakhat a chhawp chhuak a, Jeje Lalpekhlua chu he award dawng thei tur hian AIFF-in Sports Ministry lamah a dilpui dâwn a ni.