Bagnaia hmaah Enea Bastianini a thleng

Pathianni zana tlan zawh tak Aragon MotoGP-ah Enea Bastianini a tlan chak ber. Italian rider hi a hnampui Francesco Bagnaia hmaah a thleng a, tun hnaia vawi li chak zawn tawh Bagnaia rorelna a titawp.

Tlan fal thei an awm lo a, a tawp dawn thlengin an in um tawk hle. Bastiani chakna hi 0.042 seconds chauh a ni a, an inkar a zim takzet. Pathumnaah Aleix Espargaro a thleng thung.

World championship hmahruaitu Fabio Quartararo erawh a chesual. Yamaha rider Marc Marquez a tai palh a, thla li zet a chawlh hnua rawn kir Marquez tan chanchin lawmawm lo a ni ang. Chetsuala thlen danah erawh midang indem thei an ni lem lo.

Honda rider Marquez chuan, "Takaaki Nakagami leh Fabio te chungah ngaihdam ka dil, khawl thil kha ka duh angin ka thunun thei lo a ni," tiin thil thleng chu ama tihsual a nih thu a sawi.

Yamaha team boss Lin Jarvis chuan an rider Quartararo a lawm lo tih a sawi a, chutihrualin hliam na tak tuar loa an awm thei chu an lawm thu a sawi tel bawk. Quartararo hian Bagnaia lakah point 10 chauhin hma a hruai fal tawh.

Bike intlansiakna sang ber hi Asia khawmualpui lamah an tlan zui dawn. September 25, Pathianni hian Twin Ring Motegi-ah Japanese Grand Prix an tlan ang.