A chung berah Arsenal an nghet

Premier League table chung berah Arsenal an awm leh ta a, tlang thawveng aṭangin favang boruak an hip veng veng mai. Mikel Arteta naute hian eng chena rei nge a chung ber an luah theih ang tih chu zawhna a ni a, ringhlel tuten 'An awm rei lo ang' tiin an thlir ve mek bawk.

William Saliba, Gabriel Jesus leh Fabio Vieira ten Gunners tan goal an khung a, mualneitu Brentford lamin a chhanletna tur an nei lo; 3-0 in an chak. Match sarih aṭangin point 18 an nei, an hnuaiah champion lai Manchester City (17 points) leh Tottenham (17) te an awm.

Pathianni zan inkhel dangah Everton chuan West Ham United 1-0 in an hneh, point thum an hlawhchhuah theihna goal hlu tak hi Neal Maupay-a'n minute 53-naa a khung a ni - Frank Lampard tan point thum leh hnehna hi a hlu zual ngei ang.

Laipui a puak
Season hmasa tirah khan Arsenal hi Brentford khelmualah an lenglut, an match hmasa berah Arteta leh a naute an mualpho. Gtech Community Stadium-ah mualpho nawn an tum lo, a tir aṭangin tlarhnung lam an inveng uluk hle.

Bukayo Saka-a corner pet chu defender Saliba-a'n sang taka zuang chungin a tauh lut. France international hi 6ft 4in a sang a ni a, a palen bakah tauh goal turin a zuang sang tel bawk, an goal hnihna pawh lu hmanga khung tho a ni.

Captain armband hrengtu Granit Xhaka-a'n Jesus tan a siamsak a, Brazil forward hian hnai tak aṭangin a tauh lut. Chawlhlawk hmain chak tur a chiang a, second half tirah Saka ball pek dawngtu Fabio Vieira chuan yard 25 a hla aṭangin chak nemnghehna a khung.

Brentford hian an khelmuala an match hnuhnung pathumah tlawm an nei lo, tun ṭumah hian chak ni se la chuan pangana dinhmun an luah thei ang. Mahse, freekick aṭanga forward Ivan Toney-a'n a shot bak chu goal hlauhawm an nei thei lo.

Arsenal an phur
Season hmasa an inkhelh zawhin Toney hian Arsenal hi social media lamah a lo ti el tawh, tun ṭumah erawh match a zawh hnuah defender Gabriel chuan Brentford lam a chhaih let thung, khelmual chhung leh pawnah an inum zak zak.

Hliam vangin captain Martin Odegaard inlan thei lo mah se midfield an nghet ṭha. Thomas Partey leh Vieira te inkawp chuan inkhel an thunun a, mual sira awm Saka-a'n tun hnaiah sawisel tawk deuh mah se assist vawi hnih a nei, sawi nep a harsa.

England squad-a hmung chang lo Ben White chu player pawimawh a ni a, a laia ding Saliba nen an in man hle. Season kal laiah goal sarih an chhuah tawh, goal chhuah tlem lamah Man City (6) leh Brighton (6) te chauh an tluk lo - Brighton hian match khatin an khel tlem.

Champion tur sawi nan a la hma a, Champions League khel tur pawh sawi huai ngam a la ni lo. 2016-17 hnu lamah Arsenal hian UCL an la khel leh lo, tun season bul an ṭan danah erawh Arteta naute hian hma an sawn takzet a, beisei an neih san lai tak a ni bawk.

Player naupang ber Ethan Nwaneri
Ethan Nwaneri-a'n Fabio Vieira thlakin khelmual a rawn lut. Arsenal midfielder kha kum 15 leh ni 181 mi chauh a la ni a, English football inelna sang ber Premier League khel thei naupang ber a ni. English attacking midfielder khan Harvey Elliott-a record a rawn khum. Kum 2019 khan Fulham tan Elliott hian kum 16 leh ni 30 mi niin record a lo siam tawh a, a record hi tunah chuan khum a ni leh ta.

Nwaneri hian kum 14 mi lek a nih lai khan Arsenal Under 18 team tan a khel tawh a, an ram England tan pawh Under 16 team tan a khel phak - August thla khan Faroe Islands nen an inkhelh ṭumin an ram tan hian goal a lo khung daih tawh.

Arsenal manager Arteta chuan, "Per Mertesacker leh academy staff-te chuan Nwaneri chanchin min hrilh a, amah ka hmuh khan ka ring ngam bawk. Martin Odegaard a inhliam a, a tan hun ṭha a inher chhuah phah ve bawk a ni," tiin a sawi.

Brentford laka inkhel thunun tur chuan hmun awl kan pek loh a ngai, ka naute khan kan zir leh sawi lawk ang chiahin an ti thei, chu chuan min ti lawm hle. Nikuma kan chak lohna hmun kha a ni a, tunah erawh Arsenal tho ni mah ila team hran daih kan ni tawh. Kan chak lohna kha nasa takin kan siam ṭha, player pawh kan inthlak kual nasa tawh hle. Team chhung boruak a nuam a, mitin kan inpawh tlang vek. Player ten an duh ang leh nuamti taka an khelh theih hi chuan a lawmawm. - Mikel Arteta, Arsenal manager