Zote Honda MPL9-ah goal 30 a lut tawh

Zote Honda MPL9-ah round thum khelh zawh a ni tawh a, goal 30 lut tawh mah se goal khung thei fal an la awm lo. Round thumnaah goal riat chauh a lut a, round hmasa lama goal khung lo vekin goal an khung!

Goal a lut tam lo
Tun season MPL-ah hian match 12 khelh a ni tawh a, goal 30 lut tawhin match tinah goal 2.5 lut ang a ni. Goal luh dan bikah Europe inelna sang nena khaikhinin MPL-ah goal a lut tam lo.

Premier League khelh mekah match 67 khelh a ni tawh a, goal 198 lut tawhin match tina goal 2.96 lut ang a ni. Top scorer Erling Haaland chuan goal 11 ngawt a khung tawh.

La Liga-ah match 60 khelh a ni tawh a, goal 159 lutin match tina goal 2.65 lut ang a ni a, goal khung tam ber Robert Lewandowski-a'n goal riat a khung.

Serie A-ah match 70 khelh a ni tawh a, goal 170 a lut. Italy rama inelna sang ber hi goal khung harsatna tiin an sawi ṭhin a, match tina goal 2.43 lut ang niin MPL aiin goal a lut tlem zawk. Goal khung tam ber Marko Arnautovic-a'n goal ruk a khung mek.

Bundesliga-ah match 63 khelh a ni tawh a, goal 178 a lut. Match tina 2.78 goal lut ang a ni a, goal khung tam ber Union Berlin forward Sheraldo Becker-a'n goal ruk a khung.

Ligue 1-ah match 80 khelh a ni tawh a, goal 243 lut tawhin match tina 3.04 goal lut ang a ni. Europe inelna sanga goal luh tamna ber a ni a, top scorer Neymar-a'n goal riat a khung tawh a ni.

Own Goal Pakhat
MPL9-ah hian mahni lama tilut pakhat chauh a la awm. September 16, Zirtawpni tlai inkhelah Chhinga Veng leh FC Venghnuai te an inkhel a, Chhingcows wingback Laltluangliana cross chu Venghnuai defender Lalnunsiama'n an lamah a ti lut.

Chutihrualin September 15, Ningania FC Bethlehem leh Chanmari FC te inkhelh ṭumin Bethlehem goalkeeper V. Lalthlamuanpuia'n an lama ti goal anga record a ni. Amaherawhchu replay en let a nih hnuah Chanmari wingback Lalremruata corner chu goal zawnah a kal avangin goal hi Remruata khunga chhinchhiah a ni ta zawk.

Goal khungtute hi
MPL9-ah hian own goal chhiar tel loin goal 29 a lut tawh a, player 28 khung a ni. Bethlehem winger Lalruatpuia chu goal hnih khung thei awm chhun a ni a, round hmasa pahnihah goal khung ve vein round thumnaah erawh Chanmari FC lakah goal khung theihna hun ṭha an bawhpelh.

Tun season-ah hian goal khung thei bik player-te khelmualah an theihna an la pholang lo. MPL9-ah hian ṭum hnih top scorer ni thei Mizoram Police forward Lalbiakhlua (Biaktea) leh Lalfakzuala te pawh an tel a, anni pahnih hian goal an la khung lo ve ve.

Police player dang F. Lalrinpuia (Valpuia) pawh top scorer a ni tawh a, amaherawhchu Valpuia hi inhliam vangin a la inlan lo. Police chhuanvawr Malsawmfela hi top scorer la ni lo mah se best forward ṭum hnih ni tawh a ni a, ani pawhin goal a la khung lo. Mak ang reng tak erawh Police hian goal hnih chauh an la khung a, an goal khungtute hi defender ve ve an ni.

MPL9-ah hian top scorer ni tawh MS Dawngliana leh MC Malsawmzuala te Aizawl FC leh Chawnpui FC tan an khel a, striker ṭha pahnih hian goal khat ve ve an khung tawh. MPL top scorer ni tawh zinga tun season-a khel tawh lo awmchhun chu Laldampuia Tochhawng chauh a ni.

Engtin zel?
Goal luh tam tawk loh chhanah hian chhan hrang hrang a awm thei. MPL9 hi RG Stadium-ah khelh a ni a, Lammual aia a zauh bakah player-ten ground an la bel tawk loh avangin goal a lut tam tawk loah a ngaih theih.

Chutihrualin a chhan bul ber erawh team tin an intluk tlang a, foreigner awmna team an awm loh avangin team ṭha fal an awm lo. Match thum khelha la chak vek Aizawl FC pawh an goal difference chu 4 chauh a ni a, chiang taka chak an la nei lo.

Tun thlenga point hmu lo awmchhun Electric Veng goal difference pawh -3 chauh a ni a, match tinah goal khat chauh zelin an chak lo tihna a ni a, an vanduai tiin a sawi theih. Goal luh dan aṭanga tehin team an intluk tawk a, team tin minute 90 chhung an ṭang tluan thei zel a, hun tawp lamah inthlahdah an la awm lo tiin a sawi theih bawk.