PSG chakna Lionel Messi

Lionel Messi-a goal hmangin Paris St-Germain chuan Lyon 1-0 in an hneh a, match riat aṭanga point 22 hmuin Ligue 1 table chung berah an awm - an elpui Marseille erawh Rennes nen an inhnehtawk thung.

Pathianni zan Parc Olympique Lyonnais-a inkhelah Christophe Galtier-a'n midfield a tidanglam hret a, ball thiam Marco Verratti leh Fabian Ruiz te bul a ṭantir a, tlarhma lamah Messi, Neymar leh Kylian Mbappe te an inkawp leh bawk.

Minute ngana lekah goal kan hmu. Messi leh Neymar ten rang leh mawi zetin ball an inpe a, box chhungah Argentina captain hian laklawh nei miah loin a khung, keeper Anthony Lopes tan dan theih a ni lo.

Messi-a'n amah vengtu leh keeper paltlang mah se, a chip luh tur chu goalline aṭangin Castello Lukeba chuan a lo tauh chhuahsak a, a hnuah keeper Lopes chuan ṭha takin a dansak bawk.

Neymar leh Mabppe te pawhin hun ṭha an nei, mahse an goal khung loh zan a ni. Hun tawp dawna Messi-a freekick pet chu Lopes-a'n a lo khawih hram a, goal bar a per dawp - goal khatah an lungawi a ngai.

Barcelona captain hlui Messi-a'n season kal laiah goal ruk a khung a, ṭhiante khung tur vawi sarih a siamsak tawh bawk. Inkhelh banah hnehna changa international break an hmang thei tur chu lawmawm a tih thu a sawi.

PSG coach Galtier chuan, "Hnehna kan chan hi a lawmawm, kan elpui an lo chetsual ve leh bawk avangin a lawmawm dan a thuah hnih. Champions League khel hah kan ni tih hriat loh khawpa kan khel chhuak thei kha a lawmawm," a ti.