Brighton coach thar De Zerbi

Brighton & Hove Albion chuan Graham Potter thlak nan Shakhtar Donetsk leh Sassuolo manager hlui Roberto de Zerbi an lalut. Kum 43 mi Italian manager hian Ukraine rama indona vangin July thla khan Shakhtar a chhuahsan a, hemi hnuah club enkawl a la nei leh lo.

Kum 43 mi De Zerbi hian kum li daih contract a ziak a, hna thawk ṭan turin 'work permit' tihfel a la mamawh. Seagulls-in Italian manager hi Potter-a thlak nana an duh ber a ni a, international break a awm dawn avangin insiamremna hun ṭha tak a nei thei ang.

Napoli midfielder hlui De Zerbi hian kum 2008 leh 2021 chhung khan hlawhtling takin Sassuolo a enkawl a, Italian club tenau hi a sang pariat zingah ṭum hnih a awmpui. Kum 2021 khan Italian manager hian Shakhtar Donetsk a pan a, Ukrainian Cup-ah nomawi chawipuiin Ukrainian Premier League-ah pakhatna dinhmun luahpui mah se Ukraine leh Russia buaina vanga inelna khelh zawh theih a nih loh avangin 'champion' a puan erawh an ni lo.

Brighton chairman Tony Bloom chuan, "Roberto-a'n kan sawmna a pawm hi kan lawm hle. A naute a khelhtir dan leh a football khelhpui dan hian min tiphur a, a inrintawkna leh a khelhdan phung hi kan team nen pawh a inrem viau turah ka ngai," tiin a sawi.

Seagulls hian match ruk aṭangin point 13 an hmu tawh a, table-ah palinaah awm mekin Potter-a chhuah hnuah competitive match an la khel leh lo. De Zerbi hian Zirtawpni zan khan England a thleng a, Inrinni zana Chelsea leh Brighton inkhel kha a hmunah a en a ni.

Brighton hian October 1-ah Liverpool an hmachhawn dawn a, Reds zawh hian Tottenham, Brentford, Nottingham Forest, Manchester City leh Chelsea te an hmachhawn nghal dawn avangin hmabak a hautak dawn hle.