Covid-19 vangin futsal ṭan hun sawn

AIFF League Committee Meeting chu July 21 khan video conferencing hmangin neih a ni a, September thla tira Futsal league khelh tum chu Covid-19 vangin sawn a ni dawn.

Futsal league hi AIFF-in India ram pum huap club inelna an vawi khat buatsaihna tur a ni a, mipui en theih loa bul ṭan hi an ngai ngam lo. League committee hian club tel thei turte an zirchiang mek bawk. League committee hian a thu phungin Kolkata-a 2020-21 Hero I-League  khelh an remti a, inelna buatsaih turin state sorkar remtihna hmuh a la ngai thung. Hero 2nd division pawh September kar thumnaa ṭan turin ruahmanna siam a ni.

Covid-19 vangin ISL dinhmun pawh a chiang lo. Indian Super League enkawl tura din Football Sports Development Limited (FSDL) pawhin ISL season khelh nan Kerala leh Goa a remchang em tih an zirchiang a, state hruaitute nen an indawr mek. League committee hi AIFF general secretary Kushal Das-a'n a ho a, League CEO Sunando Dhar, MFA honorary secretary Lalnghinglova Hmar, Souter Vaz, Anil Kumar, BK Roka, Chirag Tanna leh Rochak Langer te an tel a, Reliance Industries-a senior vice president  Priti Srivastava pawh sawm a nih angin a tel bawk.