Milan, Juventus, Roma leh Inter an chak lo!
Pathianni zan khan Serie A-ah thil mak a thleng. Champion lai AC Milan bakah an nomawi chhuhsak tumtu - Inter Milan, Juventus leh AS Roma te an tlawm fai vek, club pali hi anmahni inhmachhawn an la awm miah lo zui.
Club lian an chesual tiin a sawi theih, chutihrualin Milan 2-1 a hnehtu hi Napoli an ni. Naples club hian beisei phak baka ṭhain season an hmang, tun hnai season li chhunga team ṭha ni phak ziah Atalanta nen point 17 ve ve hmuin table chungah an awm.
Juve an tlawm
Juventus leh Massimiliano Allegri dinhmun hi ngaihtuah tham a tling ta. Champions League-ah an mualpho a, team ṭha an hmachawn avangin sawi mam dan a awm. Serie A-ah pawh kai thar leh zel an ngam lo, Monza lakah 1-0 in an chak lo a ni.
Monza tan Christian Gytkjaer chuan minute 74-naah goal awmchhun a khung, tun season-a Italian football inelna sang bera an chak vawi khatna a ni. 1972 khan Catanzaro chuan Juve lakah hian Serie A an chakna hmasa ber an lo tawng tawh bawk.
Italy prime minister hlui Silvio Berlusconi-a club Monza hi playoff aṭanga Serie A khel phak ve mai kha an ni a, an match hmasa paruk zinga pangaah an tlawm, tunah erawh Juventus meuh an hneh ta, an theihnghilh tawh loh tur thil a ni ang.
Milan chak lo
Serie A champion lai Milan tana Olivier Giroud goal khung chu point hmuh nan a tawk zo lo a, an goal phurh sutna mai chauh a ni. Napoli lamin Matteo Politano hmanga penalty an khung chu Giroud-a'n sut mah se, mikhual lamin Giovanni Simeone hmangin chakna goal an khung.
Luciano Spalletti naute hian inelna hrang hrangah a zawnin match li hnehna an chang, nipui bazar lai khan an player ṭha leh tawnhriat nei tam tak chhuak mah se team nghet tak an din thei a, an beisei aia ṭhain season bul an ṭan.
Serie A team an inel tawk viau, tun kar tawpah pawh hmahruaitu an inthlak zak zak. Inter Milan 3-1 a hnehtu Udinese chuan hma an hruai hmasa a, chumi hnuah Roma hnehtu Atalanta-in an luahlan - Pathianni zan match a zawhfel chuan a chung berah Napoli an awm.
Mourinho tan red card
An mikual Atalanta lakah AS Roma 1-0 in an tlawm a, goal awmchhun ni Giorgio Scalvini-a'n minute 35-naa a khung a ni. Penalty an hlawh chhuah loh avangin Jose Mourinho a lawm lo a, khelmuala a luh hial avangin hnawhchhuah a ni.
Caleb Okoli chuan Nicolo Zaniolo lakah penalty a chawi ngei niah an ngai a, mahse match official lamin ngaihdan dang an nei. Penalty pek an nih loh avangin Roma player an lungawi lo a, an manager Mourinho pawh khelmualah a lut hial.
Mourinho hi khelmualah a lut a ni satliah lo, match referee chu Video Assistant Referee (VAR) hmang turin a ti. Portuguese manager chuan, "Penalty chiang tak a ni," tiin a ṭanna a la sawhsawn duh chuang lo.