Mizoram Lockdown (inkharkhip) ni 123

Championship lama West Brom tana khel mek Gareth Barry-a'n Premier League-a khelh laiin yellow card vawi 123-a chawi a, Premier League-ah ani aia yellow card chawi hnem an awm lo!

Premier League-a foul nei ngun ber pawh Gareth Barry a ni a, vawi 633 zet foul a nei a ni - hei erawh 2006-07 aṭangin mumal taka foul nei zat hi record ṭan chauh a ni a, '2006-07 hnua Premier League-a foul ngah ber' ti pawhin a sawi theih. England tana vawi 53 zet inlan thei Barry hian a ṭha lam pawhin record a nei ve tho a, Premier League-a inlan hnem ber niin match 653-ah zet a inlan - amah hnaih bertu Ryan Giggs chu vawi 632 a inlan a, Barry-a la inkhelh laiin Giggs erawh Wales coach a ni tawh. 

Kum 39 mi Barry hian Aston Villa-ah a career ṭanin a hming a chher a, 1997-98 kha Premier League-a a season hmasa ber a ni. Villa tan 2008-09 season thleng khelin inelna hrang hrangah match 441-a inlan a, goal 52-a khungsak - kum 2001 khan UEFA Intertoto Cup-ah a champion pui. Villa aṭang hian kum 2009 khan Manchester City a zawm a, 2012-13 season thleng khelin Premier League (1) leh FA Cup (1)-ah a champion pui. City aṭang hian Everton chu 2013-ah loan-in a pan a, season khat hnuah a nghetin a zawm. Everton-ah kum 2017 thleng a khel a, a hnuah West Brom a pan - Baggies tan vawiin thlengin a la khel.