Chhinga Veng hmaah Police

Mizoram Premier League

ṭan hmain Chhinga Veng-in MFA Super Cup leh I Day Football-ah nomawi an chawi a, champion rinkai ni chungin MPL6-ah pawh bul an ṭan ang. Chhingcows hian zanin dar 7:30 hian Lammualah MPL kai thar Mizoram Police an hmachhawn dawn.

Ṭ-a tel loin
Mizoram Police hi MPL6 Qualifier champion an ni a, hemi ṭum hian midfielder V. Lalṭanpuia chu hnawhchhuah a nih avangin match hnih hrem tur a ni a, match khat hrem a la hmabak.

Police-in season liam taa I League-a Aizawl FC champion puitu Ṭ-a tel loin MPL-ah bul an ṭan dawn a, midfield-ah Hual­ngo­hmun tlangval Lalram­thar­mawia mawhphurna a sang sawt ang.

Phuba lak tum Police
Veteran coach Ṭialthawnga hote hi MFA Super Cup semi­final-ah vanduai takin an tla a, final duhthusam ni tura beisei a thleng lo. Amaherawhchu Police hi Chhinga Veng nen I Day Football group stage-ah an awm ho a, intum tawk tura ngaih ni mah se Chhingcows-in 5-2 in an sawisa.

Police coach Ṭiala chuan, "Ṭ-a awm loh vang hian kan buai phah lo ang. Tum pakhat kan nei a, chu chu chak a ni. Chhinga Veng hneh hi kan tum," tiin a naute a ringtawk hle.

Chhinga Veng coach Lal­sang­zuala Hmar pawhin, "Po­lice hi Dinthar FC nena an practice match ka en a, hma an sawn hle a ni. Practice an nei ṭha a, kan hneh tawhna kha chu hriat reng tlak a ni tawh lo a, thil hlui a ni," tiin an intawn tawhna chu theihngilh a ṭul thu a sawi.

Mahse...
Police coach Ṭiala a huaisen a, Chhingcows coach Sanga thuhnuai rawlh takin ṭawng mah se khelmuala rinkai zawk chu Chhinga Veng an ni.

Chhinga Veng hian Sanga hnuaiah match 16 an khel tawh a, an la chak vek. Hei chauh hi a ni lo a, nomawi pahnih chawi tawhin goal 71 an khung a, match tina goal 5.92 khung ziah ang an ni.

Chhingcows hian player an nei ṭha a, goal khung pawh an awlsam. An player zinga hriam ber Malsawmfela'n MFA Super Cup leh I Day Football-ah goal 17 a khung a, match hnihah chiah goal a khung lo. Ramhlun South tlangval hi MFA Super Cup-ah best forward a thlan niin I Day Football-ah top scorer a ni.

I Day Football-ah mid­fielder R. Malsawmtluanga chu best player-ah thlan a ni a, Darlawn tlangval hi MFA Super Cup-ah best midfielder-ah thlan a ni bawk a, Chhinga Veng game siamtu a ni. Heng player langsar pahnih bakah hian tualchhung football-a goal khung thei MS Dawngliana, Laldampuia, Lalrammuanpuia leh Lalkhawpuimawia te an kawl a, supporter an neih ṭhat bawk avangin Police laka hnehna chang tura rinkai zawk an ni.

Vawiin Inkhel Tur
3:00 PM Dinthar FC Vs Chanmari FC
7:30 PM Miuzoram Police Vs Chhinga Veng