Sharapova a chak zel

Maria Sharapova chuan player tawhkhirh berte zinga mi a la nihzia a lantir zel. Nilaini zan khan Russian nula hian Timea Babos-i chu 6-7, 6-4, 6-1 a hnehin US Open second round a paltlang.

Arthur Ashe Sta­dium-a inkhelah Babos-i'n a ball vuak nat hmang ṭangkaiin set hmasa ber a la a, set hnuhnung pahnihah erawh world number 1 hlui Sharapova a chesual nawn duh tawh lo. Darkar hnih leh minute 19 an khelh chhungin Sharapova hian aces vawi 12 a siam bakah winners vawi 39 ngawt a vaw chhuak thei a ni.

Thla 15 hremna a hman zawh hnuah Sha­rapova tan tun ṭum hi a Grand Slam tournament hmasa ber a ni a, match hnih khel tawhin court chhungah darkar nga chuang deuh hun a hmang, a match hmasa zawkah world number 2 Simona Halep a hneh tawh bawk. Inkhel pahnih a hmachhawn tawhah hian awlsam takin hnehna a chang bik lo.

Grand Slam vawi nga champion tawh Sharapova chuan, "Ka ngaihdan chuan ngaiawh turin hun leh match tam zawk ka la mamawh a ni. Ka lo kir leh hnuah ka beisei phak bakin fans lamin min lawm ṭha a, anni hian ka lungngaihna tawrh tawhte min chhawk zangkhai hle a ni," tiin a sawi. Zanin hian khawtual nula Sofia Kenin nen fourth round luh inchuhin an inkhel leh ang.

Second round inkhel dangah Wimbledon cham­pion Garbine Muguruza chuan China nula Duan Ying-Ying chu 6-4, 6-0 in a sawp a, Spain star tan kumin hi US Open third round a vawi khat luhna a ni. French Open leh Wimbledon title a neih tawh avangin a tan Grand Slam nomawi pathumna dawn theihna hun ṭha a ni.

Kum 37 mi Venus Williams pawh a la tar bik lo. US nula Venus hian Oceane Dodin hneh turin winners vawi 33 zet a vaw chhuak a, harsatna nei loin 7-5 6-4 in hnehna a chang. Venus hian kuminah Australian Open leh Wimbledon final a khel a, a chak lo zawkah a ṭang ve ve thung - an ram leilung ngeiah hlawhtlin a duh khawp ang.

Kuminah hian nau pai vangin Serena Williams a inlan thei lo a, champion lai Angelique Kerber chu a match hmasa berah a chak lo bawk - hmeichhe player langsar ho tan no­mawi beisei ngam vek a ni. Wimbledon vawi hnih champion tawh Petra Kvitova, Coco Van­deweghe, Agnieszka Ra­dwanska, Daria Gavrilova leh Lucie Safarova ten hnehna an chang vek bawk.