Intum tawk tur Dinthar leh Chanmari

1st September, 2017

Mizoram Premier League champion lai Chanmari FC chu vawiin tlai dar 3:00 hian Lammualah an inlan dawn a, an khingpui tur chu an elpui Dinthar FC an ni.

Chanmari-Dinthar derby hi tualchhung football-a ngaihven hlawh ber a ni ṭhin a, team pahnih hian inkhelh hmuhnawm tak tak entu mipui an hlui tawh ṭhin.

Veteran coach H. Vanlal-thlanga'n Chanmari a enkawl hmasak ṭumin Dinthar FC hi veteran coach T. Vanlalhluna'n a ho vek bawk a, tualchhung football puipa ni pha Thlanga leh Hluna te hian inkhelh hlutna an belhchhah.

Season hnih chhung Thlanga'n MPL a enkawl loh hnuin a rawn let a, Chanmari FC bawkin Mizo coach lar hi an thlem thlu. Amaherawhchu Mizo footballer ṭha tak tak chher tawh ṭhintu Thlanga hian champion ringawt tum loin ṭha tawh sa la khawm loin ṭha chho thei tur a la khawm a, hei vang hian MPL champion lai hian foreign player an lalut a nih ngawt loh chuan champion nawn a harsa ang.

Chanmari FC coach Thlanga chuan, "I Day Football leh MFA Super Cup aṭanga thlir chuan hma kan sawn a, MPL hmachhawn turin kan inpeih tawh," tiin Vanglaini a hrilh. MPL5 champion hian I Day Football first round-ah Aizawl FC an hneh lo a, MFA Super Cup-ah semifinal-ah I League champion AFC lakah phuba an la a, final an thlen theih hnua hma an sawn cheu a nih chuan an hmuhnawm ang.

Dinthar FC-in I Day Football group stage an paltlang thei lo a, coach Lalhlupuia Sailo-in huaisen takin an squad a ṭhuah fai a. Dinthar pachal Lalhlua hian MPL-a chhawr tlak 20 chiah training a pe a, fitness nei ṭha tawk lo player-te erawh an insiamṭhat hma chu training zawm a phal lo.

Veteran coach rorum Hluna awm tawh lo mah se Dinthar FC-in Lahlua an nei a, tum an hautak ang. Maimawms boss Lalhlua chuan, "Kan fitness a ṭha tawh a, player-te an inhrechiang tawh a, inkhelh hun a nghahhlelhawm tawh khawp mai," tiin Chanmari FC khelh a châk tawh thu a sawi.

Dinthar FC hian foreigner pahnih an kawl a, midfielder Clarence Carter-a chawm turin Nigerian forward Jackson Victor Ogheneochuku an nei a, MPL champion nen intluk tawk tur an ni.