VAR hian hun a mamawh - Ferguson

Manchester United manager hlui Sir Alex Ferguson chuan video assistant referee (VAR) chu tun dinhmunah chuan a la ṭha tawk loin a hria a, chutih rualin a ṭhatna ang taka lang chhuak turin hun a mamawh thu a sawi.

Video hmanga inkhel en let leh theihna VAR hi tun season aṭangin Italian Serie A leh Germany-a league sang ber Bundesliga-ah te hman ṭan a ni a, sawi zui pawh a hlawh hle.

Ferguson chuan, "Hmasawnna rawn kal zel tur hi kan dang thei lo a, chuvangin VAR pawh hi kan hman a ngai. Hmanraw thar a la nih rih avangin duhthusam lohna lai chu a awm ngei a, chutih rualin hun kan pek ve chu a ngai a ni. UEFA lam pawh hian engtiang chiaha ṭha nge a nih hi a la zirchiang mek zel niin ka hria," tiin a sawi.