Reds player thar Chamberlain

Liverpool chuan Arsenal midfielder Alex Oxlade-Chamberlain chu pound maktaduai 35-in an lalut. Kum 24 mi midfielder lalut turin Chelsea chuan Arsenal inremna neihpui hmasa mah se England international hian Stamford Bridge pan aiin Anfield-a khelh a thlang zawk a, Arsenal leh Chelsea-a hlawh tur aiin Liverpool-a a hlawh tur zat hi a tlem zawk!

Arsenal hian season tawp ruala a contract hmang zo tur midfielder hi kar khata £180,000 hlawha contract thar ziak turin an thlem a, an thlem thlu zo lo. Chelsea an lo lang a, Blues-in kar khata hlawhtir an inhuam zat nia sawi hi £220,000 lai a ni. Mahse, English midfielder hian central midfield-a khelh a duh avangin kar khata £120,000 hlawh tura thlemtu Liverpool lam pan a thlang a, kum nga chhung atan contract a ziak.

Oxlade-Chamberlain hian August 2011 khan Southampton aṭangin Arsenal hi a zawm a, match 198 a inlanah goal 20 a khungsak a, tun season-a match li an khelh tawhah pawh a inlan kim vek. Reds a pan chhan hi a duhna hmun taka a khelh theihna tur a nih piah lamah a naupan tet aṭanga a entawn Steven Gerrard khelhna ṭhin a nih vanga ngaih a ni.

Liverpool boss Jurgen Klopp chuan, "Ox hian Reds zawm turin thutlukna harsa zet a siam a, club ropui tak zawm turin club ropui tak tho a chhuahsan. Duhthlan tur tam tak a nei ang tih ka ring a, kan chang thei hi ka lawm takzet a ni,"

"Awlsam takin thutlukna a siam lo ang tih ka ring a, mah se kan squad leh min ṭantu rinawm tak tak kan neihte zinga a lo tel ve thei ta hian minti lawm hle. Liverpool chhungkuaah ka lo lawm a ni," tiin a sawi.