Ramhlun North = I League champion AFC!

I league champion Aizawl FC leh playoff hmanga Mizoram Premier League-a inham tang Ramhlun North FC-te 1-1 in an inhnehtawk.

Nimin tlaia Lammuala MPL6 inkhel hmasa berah Ramhlun North tan minute 12-naa goal hmahruaitu khungtu Lalliansanga (Notea) chu man of the match-ah thlan a ni a; Aizawl FC tan Jonathan Lalrawngbawla'n minute 35-naah a sut. Mizo football legend S. Malsawmtluanga chuan minute 76-naah goal khungtu Jona thlakin atana MPL match hmasa ber a khel ve bawk.

Samson hnuaiah

Ramhlun North-in I Day Football-ah Aizawl FC an hneh lo a, MPL-ah erawh goal an khung hmasa zawk. Captain C. Ramdinmawia ball vawrh luh chu Notea'n a awma la thlain goal hmahruai khung nan a hmang a, Durtlang tlangval hian goal dang khung theihna hun ṭha erawh a hlah.

Coach thar Samson Rameng­mawia hnuaia an match hmasa berah Ramhlun North an khel ṭha a, chak thei dinhmunah dingin substitute Lalremruata'n hun tawp dawnah chance ṭha bik a hlah bawk.

Ramhlun North honorary secy K. Lalenghluna (Maenga) chuan, "Coach thar hnuaiah hmasawna hmuh tur a awm a, kan lawm hle a ni," tiin Vanglaini a hrilh.

Game rang

Portuguese coach Paulo Mene­zes-a'n game rang khelh an tum thu Vanglaini a hrilh lawk a, Aizawl FC-in passing game mawi an khel a; amaherawhchu a hmawr bawk dan erawh an zir ṭhat a ṭul hle.

Minute 35-naah defender Lalhriatrenga ball vawrh chhuah chu Jojo-a'n um lutin goal zawnah a pet thei hrim hrim chu a vanneih pui a, Ramhlun North keeper Liansangpuia'n a hna a tlin lo.

Sangpuia hian hun tawpah erawh a tihsual nawt rehin AFC winger Rochharzela khung tur a dang a, 1-1 in an inhnehtawk.

AFC coach Paulo Me­nezes chuan, "Kan khelh danah lawmna tur a tam a, player inhliam kan ngah vangin duh angin player a la rem theih loh. Tlarhma lam kan inchher hriam belh a ṭul a ni," tiin Vanglaini a hrilh.

ZoFooty Statistics
Ramhlun North 1 - 1 Aizawl FC
RNFC : Lalliansanga (Notea) 12'
AFC : Jonathan Lalrawngbawla 35'
MoM : Lalliansanga (Notea), Ramhlun North
45% Ball Possession 55%
9(5) Shots (On Target) 10(4)
0 Yellow Card 3
0 Red Card 0
Powered by Rainbow
Multibrand Mobile Showroom