Germany leh England inlan zan
FIFA World Cup 2018 khel tur zawnna zanin hian neih a ni dawn a, Group C hmahruaitu Germany leh Group hmahruaitu England te an inlan dawn.
FIFA Confederations Cup champion hlim Germany hian pathumna dinhmun hauh mek Czech Republic nen zanin dar 12:15 hian Eden Arena, Praha-ah an khel dawn a, Sony Ten 2-ah a en theih ang. England-in point la hmu lo Malta an tlawh dawn a, he inkhel hi Sony Ten 1-ah a en theih thung ang.
100% = WC Ticket
Germany-in qualifier match ruk an khelh tawhah an la chak vek a, October thla khan Die Mannschaft hian zanina an khingpui tur Czech Republic hi an mualah 3-0 in an hneh tawh. Joachim Low hote hian hnehna an chang a nih chuan World Cup khel turin an tling ang.
Die Mannschaft boss Low hian player naupang tak hruaiin Russia-ah Confederations Cup nomawi an chawi a, tun ṭumah hian inhliam vangin Bayern Munich keeper Manuel Neuer leh Manchester City midfielder Ilkay Gundogan te chu duhthusamin la chhawr thei lo mah se senior player Mats Hummels, Thomas Muller, Mario Gomez, Sami Khedira, Toni Kroos leh Mesut Ozil te chu squad-ah a ko a. Juventus midfielder Khedira erawh a khup hliam vangin Czech a hmachhawn thei dawn lo a, Thawhṭannia Norway an hmachhawn hunah erawh a inlan theih beisei a ni a. Hoffenheim-a loan hmanga khel mek Serge Gnabry pawh nghal rek na vangin squad aṭangin a inhnukdawk.
Germany manager Oliver Bierhoff chuan, "Confed Cup hmangin player tam zawk chhawr theihna hun ṭha kan nei a, squad ṭha tak kan neih phah a ni. Qualifier-ah hnehna kan la chang vek a, he record hi chhunzawm zel kan duh," tiin a sawi.
Czech Republic hian point kua an hmu a, Germany nena an inkarah hian point 13 hmu tawh Northern Ireland an awm. Playoff khel pha turin pahnihna dinhmun tal hauh a ngai a, Northern Ireland hian point la hmu lo San Marino an hmachhawn dawn avangin Czech tan point hloh a thiang tawh lo. Czech hian Die Mannschaft laka hnehna an chan theih chuan Thawnṭanni zana Northern Ireland nena an inkhel boruak a sang sawt ang.
Chak mamawh England
England hi group hmahruatu ni mah se anmahni hnaih bertu Slovakia aiin point hnih chiahin an sang a, pathumnaa awm Slovenia an inthlauhna pawh point thum chauh a ni.
Gareth Southgate-a'n England a enkawl hmasak berah Malta 2-0 in an hneh a, anni hi zanina an khingpui tur niin point an la hmu lo. Three Lions tan Malta hi hneh harsa tur a ni lo a, amaherawhchu nizan khan transfer a tawp a, thutharthehdarhtu ten uchuak taka transfer chungchang an ziah nasat avangin English player-te hi inkhel turin an rilru a inpeih lo thei bawk.
England number 1 keeper Joe Hart-a'n khelmualah hmasawn lam aiin tlakhniam lam a pan a, amah thlak thei tur awm ber Jordan Pickford a inhliam avangin Jack Butland a inlan a nih pawhin a mak lo ang. Tlarhma lamah Wayne Rooney-a'n England boss kohna a hnar a, August thlaa Premier Leauge-a goal la khung lo Harry Kane chu rinrawl tur ni a, Dele Alli leh Jordan Henderson ten Tottenham forward hi an thlawp a rinawm.
Group C inkhel dangah Slovakia leh Slovenia te an inkhel dawn a, pahnhna dinhmun inchuhna hi inkhel pawimawh a ni.