Baggies tana khel tur PSG midfielder

West Brom chuan Arsenal left back Kieran Gibbs chu pound maktaduai sariha an lakluh thu an puan hnu lawkin Paris St-Germain midfielder Grzegorz Krychowiak chu season khat chhung an hnena khel turin loan-in an lalut bawk.

Poland international Krycho­wiak hian nikum khan Sevilla aṭangin PSG hi pound maktaduai 28 ngawtin a zawm a, mah se a pu hlui Unai Emery hnuaiah beisei anga hmun chang tam tawk loin season hmasaah khan match 10-ah chiah inkhel bul a ṭan a ni.

Krychowiak hian Sevilla tan a khelh laiin Europa League nomawi vawi hnih a chawi a, season hmasaah khan PSG chu French Super Cup, League Cup leh French Cup-ah champion nomawi a chawi pui bawk.

Poland tana vawi 45 inlan tawh midfielder chuan, "Spain leh Italy aṭangin sawmna tam tak ka hmu. Mahse, Baggies hi club hmasawn tum tak a nih avangin pan ka châk a, he club boruak hi a ṭha em em a ni," tiin club dang hnawla English club a pan chhan a sawi.