Pakistan cricketer Sharjeel hma hun a thim
Pakistan batsman Sharjeel Khan chu spot fixing-ah a lo inhnamhnawih avangin Pakistan Cricket Board (PCB) chuan kum nga chhung cricket khel thei lo turin an hrem a, hetihrual hian a thubuai ngaihtuah a nih chhunga nungchang ṭha taka a awm avangin a hremna hi kum hnih leh a chanve a tihtawi a nih thu an puang nghal bawk.
PCB hian an rama club cricket inelna Twenty20 Pakistan Super League-a thamna sum lak chungchang chu hun rei tak chhung an lo zirchiang tawh a, Sharjeel hma hian all rounder Mohammad Nawaz leh seamer Mohammad Irfan chu hremna an lo pe tawh bawk. Sharjeel hi kumina Islamabad United leh Peshawar Zalmi inhmachhawn ṭuma spot fixing-ah inrawlha puh a ni.
Kum 28 mi batsman hian Pakistan tan test match khat a khel tawh a, one day international-ah match 25 inlanin T20-ah ram tan match 15 a khel tawh bawk.
Spot fixing hi match fixing nen inzul viauin lang mah se a inlang lo. Inkhel result thlak danglam hlawk tura player-ten thamna an lak hi match fixing a nih laiin over khat emaw ball vawi khat vawm bik emaw a thamna sum player-ten thamna an lakin spot fixing a ni thung.