Player 9-a khel Dinthar lakah Chanmari vannei
Mizoram Premier League-ah Dinthar FC leh Chanmari FC an inkhelh chuan boruak a sang ṭhin a, nimina Lammuala an intawn ṭum pawhin player pathum hnawhchhuah a ni. MPL champion lai Chanmari FC-in Jakob Vanlalhlimpuia goal hmangin 1-0 in hnehna an chang hram.
Dinthar an ṭha zawk
Boruak nuam tak hnuaiah team inhal tak Chanmari FC leh Dinthar FC ten inkhel nung tak an lantir.
Maimawms-in an foreigner pahnih Clarence Carter leh Jackson-te bul ṭantirin khelmual chhunga an chungnun theihna chhan an ni.
Dinthar forward Lalnunsanga'n (Talea) box pawn chiah aṭangin goal zawnah a pet lo a, Armed Veng South tlangval hian tauh goal theih na turah a khawih hman lo bawk.
Chanmari tlarhnung tan Dinthar forward Jackson a hnawksak a, Nigerian forward Jackson hian vengtu nei chungin kawh zetin goal-ah a pet a, keeper F. Lalmuanawma'n a dan sak.
MPL champion lai Chanmari FC tan first half tawp hma hretin Hnahthial rawlthar Jakob-a'n a duhtui hret a, hun a khawh ral hnem avangin goal-ah a pet hman lo.
Danglamna red card
Second half ṭan hnu lawkah Dinthar FC forward Samuel Laltlanthanga'n hla tak aṭangin crossbar a pet per a, Chanmari FC midfielder Joseph Lalfakzuala'n goal ban a tauh per ve bawk.
Minute 54-ah Maimawms player zinga khel ṭha ber Jackson chu a hnampui Clarence a chhanna lamah hnawhchhuah a ni a, Chanmari FC lam yellow card chauha hrem an nih avangin Dinthar FC ṭantu tan an red card hmuh dan hriatthiam a har ang.
Chanmari FC-in an tamna hmang ṭangkai zui a, Jakob-a'n minute 65-naah ball ṭha a hmu fuh a, Hnahthial tlangval hian keeper MS Dawngzela chiah a hmachhawn hnuah harsatna nei loin a khung.
Minute hnih hnuah Chanmari winger Lalmuanzova'n chiang zetin Zothanzuala a bum a, Dinthar wing back insum zo loin chiang taka Muanzova a pet thluk avangin hnawhchhuah nghal a ni. Maimawms-in player 10-in an khelh a ṭul phah.
Amaherawhchu, MPL champion-in an tamna an hmang ṭangkai thei lo a, Dinthar FC-in hun tawp thlengin an nawr let a. Nigerian midfielder Clarence-a'n box pawn chiah aṭangin freekick a pet goal lo. Chanmari an talbuai avangin injury time-ah goal khungtu Jakob-a'n ṭul lo takin Dinthar midfielder Lalbiakhlua titluin hnawhchhuah a ni ve bawk.
Engtin zel?
Chanmari FC-in nomawi humhim an tum a nih chuan tuna an squad ang chuan a harsa dawn lo tih a lang nghal. Anni lam pawhin an chak tawk lo tih an chiang a, Liberia striker Alex Whittemore an lalut tawh - training a la zawm loh avangin Dinthar FC lakah an chhawr lo.
Chanmarians hian September 8 zanah Aizawl FC an hmachhawn dawn a, foreigner an mamawh belh dawn em tih chu I League club lakah a chiang ang.
Hun chanve a zawhin Dinthar FC chu point thum hmu tur angin an lang hman a, amaherawhchu an player pawimawh hnawhchhuah a nih avangin point an hmuh loh phah. Maimawms hian Nigerian forward Jackson-a tel loin September 7 zanah Ramhlun North lakah point hmuh an tum ang.
ZoFooty Statistics
Dinthar FC 0 - 1 Chanmari FC
CFC : Jakob Vanlalhlimpuia 65'
MoM : Joseph Lalnunpuia, CFC
48% Ball Possession 52%
9(1) Shots (On Target) 12(1)
2 Yellow Card 4
2 Red Card 1
Powered by Rainbow
Multibrand Mobile Showroom