Chawnga enkawl BVT chak

Mizoram Premier League Season 6-ah Bethlehem Veng­thlang FC an chak hmasa ber - August 31 zan khan coach Chawngthansanga hote hian Lalrammawia leh Van­lal­thanga te goal hmangin Chanmari West FC 2-1 in an hneh.

BVT captain Rammawia chu man of the match-ah thlan a ni a, season liam taa final thleng pha Bethlehem Vengthlang hian ruahsur zanah ṭantu an nei ṭha hle.

Mi thar inlan

Chanmari West coach HC Zarzoliana'n season liam taa MPL best defender H. Lalhlimpuia leh Shillong Lajong midfielder hlui Lalramluaha-te chu starting eleven-ah an awm nghal.

Ramluaha hi inhliam vang­in minute 42-naah thlak a ngai a, MFA Super Cup leh I Day Football-a West Warrior pawimawh Lalromawia'n a thiam pholanna'n a hmang.

Goal thum chu

Ṭan phat aṭangin inkhel a nung a, BVT-in minute 27-naah counter attack hmangin an vaw let a, Rammawia'n a ṭhiante pek tur an awm reng laiin goal-ah a pet a, BVT captain hian a huaisen rah sengin goal hmahruai a khung.

Chanmari West midfielder ball pet thiam Jacob Lalrawng-bawla ball duhthusam chu H. Lallianzama'n khawih per zauhin minute 35-naah an si purh a sut a, Zobawk tlangval goal khung hi a mawi hle.

Second half minute 62-naah BVT-in chakna goal an khung a, Huangohmun tlangval VL Thanga'n ball per chang fuhin hnai tak aṭangin a ke dinglamin a pet goal a, chakna goal a ni zui bawk.

A hmuhnawm

Team pahnihiin chak tumin an khel ve ve a, defensive game an khelh loh avangin a hmuhnawm. BVT midfielder Lalnuntluanga freekick chu West Warrior keeper Vanlalhriata'n ṭha takin a dang a, K. Lalnunzama freekick erawh crossbar chungah chiah a kal.

Chanmari West-in chance ṭha an nghah a, Lalremruata shot-cross chu keeper LK Hma­ngaihzuala'n (Lalmama) dang fuh tawk loin a goal teuh hle. Lajong midfielder hlui Jacob-a'n goal ban a pet per a, second half-ah defender thar Lalhlima'n halfway line pelh hret aṭangin goal-ah petin keeper Lalmama'n a nam per hman.

Injury time-ah Lianzama'n BVT offside trap a bum a, keeper Lalmama tlan chhuak hmuin pet khum mah se goal sirah chiah chiah a kal a, an match hmasa berah Chanmari West an vanduai.

BVT mipui

Bethlehem Vengthlang mipui Lammuala an pungkhawm ṭhat ber ṭum a ni lo a, amaherawhchu K. Kawla Stand mawi tham kalkhawmin an zai thawm chu player-te tan phurna tham a la tling cheu a, an chak phah bawk.

BVT hian September 7 tlai hian Mizoram Police an hma­chhawn ang a, September 8 tlaiah Chanmari West-in MFA Super Cup leh I Day Football-a an hneh tawh loh Chhinga Veng FC an hmachhawn thung ang.

ZoFooty Statistics
Bethlehem VT 2 - 1 Chanmari West FC
BVT : Lalrammawia 27'; Vanlalthanga 62'
CWFC : H. Lallianzama 35'
MoM : Lalrammawia,
49% Ball Possession 51%
11(6) Shots (On Target) 15(7)
1 Yellow Card 1
0 Red Card 0
Powered by Rainbow
Multibrand Mobile Showroom