Set nga hnuah Federer a chak

Roger Federer-a'n tun hnai ni nga chhungin set nga vawi hnih a khel a, hnehna a chang ve ve. Ningani zan khan Federer hian Mikhail Youzhny hnehnin US Open third round a inhlangkai a, nimin zing khan Rafael Nadal pawhin set hmasa ber a hloh zet hnuah second round a paltlang ve bawk.

Flushing Meadows, New York-a inkhelah US Open nomawi vawi nga chawi tawh Federer hian darkar thum leh minute sarih chhungin Youzhny lakah hian 6-1, 6-7 (3-7), 4-6, 6-4, 6-2 in hnehna a chang, vawi 17 an intawn tawhah Federer hian hnehna a chang fai vek a ni. Seeded pathumna Federer hian zaninah seeded 31-na Feliciano Lopez a hmachhawn leh nghal ang.

Grand Slam vawi 19 champion tawh Federer hian a thiam a la theihnghilh lo a, chutihrualin a kum a tam tawh avangin set nga khel zawn reng tur chuan a thain a tlin meuh tawh lo mai thei, thlen san a duh a nih chuan court chhunga hun hman rei loh dan a ngaihtuah a ngai.

Kum 36 mi Federer chuan, "Tun ṭum kan inkhel hi fiahna a ni a, chutihrualin round sang zawk khel tura intuai hriamna ṭha tak a ni bawk. A zawna set nga a khelh theih avangin ka lawm a, duhthusamah chuan set thum chhunga hnehna chan a ni," a ti. Federer hian kumin Wimbledon-ah khan set hloh miah loin nomawi a chawi thei a ni.

Nimin zing inkhelah world number 1 Nadal-a'n Japan tlangval Taro Daniel lakah set hmasa ber a hloh a, set hnihnaa game thumnaah a service a hloh bawk. Mahse, Nadal hian a khelhdan phung thlakin base line-ah a tawlh hnung tam a, rei tak tak rally neih puiin inkhel a thunun zui a, darkar hnih leh minute 53 an inkhelh hnuah 4-6, 6-3 6-2 6-2 in hnehna a chang.

Seeded pakhatna Nadal chuan, "A nihna takah chuan ka khelh ṭhat ber ni ka tawng lo a, chutihrualin hnehna chang turin ka bei na ve tawk tih a chiang. Kawng thui tak zawh tur a la awm a, a tawp thlen ka tum ang," a ti. Nadal hian Leonardo Mayer a hmachhawn leh ang. Kumin US Open hi zan dar 8:00 aṭangin Star Sports Select 1-ah live ṭhin a ni.