PSG-ah Kylian Mbappe a kal ta e

Paris St-Germain chuan Monaco rawlthar duhawm Kylian Mbappe chu season khat chhung an hnena loan-a khel turin an lalut a, a ngheta an lakluh huna a man zat atana an insen tur zat hi pound maktaduai 165.7 a ni.

PSG hian Mbappe hi a nghetin lakluh nghal duh mah se UEFA Financial Fair Play dan hnuaiah Neymar chu pound maktaduai 200-a an lo lakluh tawh avangin hremna hmachhawn thei dinhmunah an ding a, hei vang hian a ngheta lalut loin loan-in an la phawt a ni. Mbappe hi a ngheta an lakluh hunah chuan June 2022 thleng cham turin contract a ziak ang.

Kum 18 mi forward chuan, "Europe-a club hmabak nei eng ber pawl ka zawm a, he club tana khelh hi ka duh takzet a ni," tiin PSG a zawm chhan a sawi. France international hi Real Madrid, Liverpool, Manchester City leh Arsenal te nen pawh sawizawm a ni hman.

PSG president Nasser Al-Khelaifi chuan, "French football tan ani ang rawlthar ṭha kan enkawl a, hmasawnna kawnga kan puih hi a ṭha a ni. A kum ang zat player-ah chuan khawvela beiseiawm ber pawl a ni a, a thiamna piah lamah tharum a ngahin a rilru a huaisen em em a ni," a ti.

Mbappe hian season hman zawh takah khan Monaco tan match 44 khelin goal 26 a khung a, assist 11 a nei bawk.

An player thar chung­chang sawi zawmin Nasser Al-Khelaifi chuan, "A kum la naupang hle mah se a theihna a sang tawk tawh a, player ṭhain an neih tur ang hi chu a nei kim thawkhat hle," tiin a fak.

PSG hian Neymar an neih belh hma pawhin tlarhma lama tlan tur Edinson Cavani, Angel Di Maria leh Julian Draxler te an nei sa, Mbappe an neih belh takah chuan league nomawi ringawt ni loin Champions League nomawi an thlir tawh ang.