Kuminah AIFF Futsal inelna Mizoramah AFC Level 1 Futsal Course

Kum 2017 chhungin All India Football Fede­ration chuan Futsal inelna buatsaih an tum thu AIFF Technical Director Savio Medeira chuan a sawi.

Hetihlai hian India rama Futsal coach-te tana training hmasa ber, Asian Football Confederation Futsal Level 1 Course chu Mizoramah leh Mumbai-ah nghah a nih tur thu a sawi bawk.

Savio chuan, "Kum khat chhungin ram tina football federation-te hian Futsal bika an hmalaknate thehluh vek a ngai tawh... tun hnaia AFC-in ni li chhung Futsal work­shop an neihah India chu duhsakin Coach Education Programme buatsaihsak kan ni dawn a ni," a ti.

AIFF Technical Direc­tor chuan, "November-ah hian Coach Education Programme pahnih kan nei dawn a, Mumbai-ah leh Mizoramah kan buatsaih ang a, December-ah Goa leh Delhi lamah buatsaih leh kan tum ang," a ti.

Hetihlai hian Mizoram Football Association Futsal Committee chuan club affiliation hun a hawn chu an khar ta a, kum 2018 January-a MFA Futsal League khel thei tur zawnna playoff chu tun thla chhunga khelh an tum.

Vawiin hian MFA Futsal Committee chuan Futsal Match Official Workshop chu Rajiv Gandhi Stadium-ah an buatsaih dawn a, AFC Futsal Workshop-a kal referee-te'n FIFA Futsal dan an zirtir dawn a, club affiliation ti thar aṭangin mi pahnih ṭheuh kal turin an hriattir a ni.