Premier League Transfer tawp niah sum an seng hnem
Nimin zing dar 3:30-ah Premier League nipui transfer bazar a tawp a, transfer bazar tawp nia English league sang ber club-te sum sen zat chu pound maktaduai 210 a ni - nipui transfer tawp niah heti zata sum tam hi Premier League club-ten an la hmang ngai lo.
Nikuma nipui transfer tawp ni khan Premier League club ten pound maktaduai 155 an seng a, record hmasa zawk kumina sum sen zatin a khumna hi pound maktaduai 55 a ni. Premier League club ten tun nipui transfer pumpuia sum an sen zat hi pound tluklehdingawn 1.4 a ni a, record dinglai pound tluklehdingawn 1.165 a khum.
Sum hmang hnem
Premier League club zingah Manchester City-in an duh ber Alexis Sanchez leh West Brom defender Jonny Evans te lalut thei lo mah se sum hmang hnem ber dinhmun an luah tho a, pound maktaduai 215 an inseng. Chelsea chuan City hi dawtin pound maktaduai 192 an inseng a, pathumna Manchester United insen zat chu pound maktaduai 146 a ni.
Champions League khel tur ni si loah chuan Everton an inseng hnem ber a, Premier League club zinga sum sen hnem lamah palina dinhmun luahin pound maktaduai 135.8 an inseng. Europe-a club inelna sang ber khel tur zingah Tottenham Hotspur (£88m) leh Liverpool (£80m) te an inseng tlem hle. Nipui transfer bazar-a sum seng tlem ber chu Swansea an ni a, Welsh club hian pound maktaduai 23 bak an seng lo.
Sum chevel chu
Premier League club ten an sum hmuh aia transfer bazar-a sum an sen tamna zat hi pound maktaduai 665-a ni a, nikum aia an sen tlemna chu pound maktaduai 20 a ni. Premier League club zingah players lei nana an sum sen aia players hralhna aṭanga an sum lakluh tam zawk pali an awm a, Swansea City, Arsenal, Burnley leh Stoke City an ni.
January 2003 khan players transfer chu 'hun bik' neiin hman ṭan a ni a, heta ṭanga Premier League club-ten transfer-a sum an sen zat chu pound tluklehdingawn 10.3 a ni. A kum telin Premier League club te sum sen a pung - season ruk chhung chu a zawnin English top division club-te hian nipui transfer-a an sum sen an khum tawh.
Player manto
Tun nipui transfer-a Premier League club player lei zingah Romelu Lukaku chu manto ber a ni a, Everton striker hi Manchester United chuan pound maktaduai 75-in an lalut. Chelsea striker thar Alvaro Morata chu manto pahnihna a ni a, Real Madrid striker hian pound maktaduai 60-in Premier League champion a zawm. Manchester City-in player manto top ten-ah pathum ngawt an thawh a, pathumna Benjamin Mendy (£52m), pangana Kyle Walker (£45m) leh pasarihna Bernardo Silva (£43m) te an lang.
Arsenal-in player pahnih chiah an lalut chungin Alexandre Lacazette (£46.5m) chu manto palinaah an thawh. Everton-in sum an seng hnem a, pound maktaduai 45-a an lakluh Gylfi Sigurdsson chu parukna a ni. Tottenham che tlai deuh mah se Davinson Sanchez lakluh nan pound maktaduai 42 an seng a, manto pariatna a ni. Manchester United-in Lukaku laka an inseng hnem chungin Nemanja Matic (£40m) manah an insum lo a, Chelsea aṭanga an lakluh midfielder hi pakuana a ni - a man hi 10-naa awm Chelsea midfielder Tiemoue Bakayoko nen an in ang.