Transfer thleng ta lote

Ṭum dang ang bawkin nipui transfer-in ngaihven a hlawh a, titi leh thu lengvak pawh a tam hle. Player langsar chhuah dawn leh dawn loh chungchangah inhnialna a tam a, Premier League bik chu nimin zing dar 3:30 khan engkim a chiang tawh.

Premier League players langsar zingah English top division veka chhuak tura ngaih Alexis Sanchez, Virgil van Dijk, Riyad Mahrez, Diego Costa leh Ross Barkley te an chhuak lo. Mahse tukin zingah Spanish football transfer a tawp ve chauh avangin he thuziak i chhiar meuh chuan player ṭhenkhat dinhmun hi a danglam hman tawh mai thei bawk.

Sanchez a chhuak lo

Transfer tawp niah Manchester City-in Alexis Sanchez lakchhuah ngei tumin thapui an thawh a, mah se an beisei ang erawh a thleng thei lo. City-in Gunners an dawrna hi pound maktaduai 55 a ni a, pound maktaduai 60 thlenga sang chho thei tura ruahmanna siam a ni. Arsenal-in kum khat chiah contract nei tawh hi chelh tum buai loin a thlakna tur Monaco midfielder Thomas Lemar an dawr ve nghal.

Gunners sum thehchhuah zat hi pound maktaduai 90 niin French club hian pawm mah se Lemar-a'n Arsenal a hnar a, Arsene Wenger-a'n France international a lak theih loh avangin Sanchez-a City panna kawng pin nghal a ni. City hian Crystal Palace lama Eliaquim Mangala kaltir an tumna chu a tlawlh bawk avangin West Brom defender Jonny Evans lak an tumna an ṭhulh ve nghal bawk.

A sukna ngaiah VVD

Southampton captain Van Dijk-a'n vantlang hriatah Liverpoool pan a duhzia a tilang a, Saints hotute hnenah chhuah dilna hial a thehlut. Mahse, Dutch defender hi youth team zingah training neihtir a nichungin an ṭanna ngaiah Southampton an ṭang tlang a, Celtic defender an chhawr chhunzawm zel dawn.

Leicester winger Mahrez chu Algeria national team-in a hma hun tichiang turin squad aṭangin chhuahtir mah se Manchester United leh Chelsea-in an duh nia sawi Mahrez chungchangah thuthar thleng a awm lo a, Barcelona nena sawizawm a nih bawk avangin he thuziak i chhiar meuh chuan Nou Camp lamah a awm tawh hial thei bawk.

Chelsea hnartu Barkley?

Blues-in pound maktaduai 30-a Barkley lakluh an tumna chu Everton-in pawm mah se England international hian Goodison Park-ah contract thar a ziak duh lo chungin Premier League champion hi a hnar. Everton neitu zinga mi Farhad Moshiri chuan, "A man zat kan pawm a, Blues nen an inrem thlap bawk a, mah se medical a paltlang vek hnuah a rilru a thlak leh a ni," a ti!

Kum 23 mi midfielder hi malpui hliam vangin a chawl mek a, thla thum chhung chu a la inkhel thei dawn lo. Barkley lam hnai tak a hming tarlan loh chuan, "Ross hian a club tharah inhliam saa kal ai chuan a dam chian var hunah a kalna tur chungchanga thutlukna siam a duh zawk a ni," tiin Chelsea a pan loh chhan an sawi.