Palace defender thar Sakho

Crystal Palace chuan Liverpool centre back Mamadou Sakho chu pound maktaduai 26-in an lalut. Reds hian French defender manah hian pound maktaduai 30 aia tlem an pawm loh tur thu sawi mah se transfer tawp niah an ṭang zo lo.

Leicester City leh West Brom pawhin an duh chunga Palace pan thlangtu Sakho chuan, "Season hmasaa he hmuna ka inkhel kha a nuam ka ti. Chona hmachhawn hautak tak ni mah se a phurawm a, chuvangin Palace pan hi ka tan a ṭha berah ka ngai a ni," a ti.

September 2013-a Paris St-Germain aṭang­a Liverpool-in pound maktaduai 18-a an lakluh defender hi season hmasa ṭan dawn khan Reds boss Jurgen Klopp nen an inhmu thiam lo a, season chawhnu lamah Palace-ah hian loan-a kaltir a lo ni tawh.