Argentina chak zawh loh niah Brazil chak

Nimin zing khan South America ram ten 2018 FIFA World Cup qualifier an khel a, world champion vawi hnih ni tawh Argentina chu an mi­khualna ramah Uruguay nen goal awm loa an inhnehtawk lai­in Brazil erawh an chak zel thung.

Centenario, Montevideo-a inkhelah Luis Suarez-a'n Uru­guay tan inkhel bul a ṭan. Barcelona leh Real Madrid te August 16-a an inkhelh hnua a inlan lehna hmasa ber a ni a, Catalan club hi chanchin lawmawm loin a deng zui. Liverpool striker hlui hi a khup na vangin inkhel tawp dawn lamah thlak a ngai. Suarez hi thlak a nih hma hian Manchester City defender Nicolas Otamendi kerek a tlawh sak vanga hnawh­chhuah a ni lo chu a vannei hle.

Kum 30 mi Suarez chuan, "Hliam tenau ka nei hlek a ni mai a, lungngaihna tur a awm lo, rei loteah ka rawn kir leh thuai ang. Tunah chuan nakkum World Cup khelh ngei tumin theihtawp kan chhuah chhunzawm zel ang," tiin a sawi.

Argentina hian beisei anga World Cup qualifier an khelh ṭhat loh avangin June thla khan an coach Edgardo Bauza an ban a, a aiawh turin Jorge Sampaoli an lalut. Argentine manager hian friendly match lamah result a neih ṭhatpui a, a competitive match hmasa berah erawh chak hmel a hmu thei bik lo.

Barceloan star Lionel Mes­si leh Juventus forward Paulo Dybala leh Angel Di Maria ten inkhel bul ṭan mah se goal hmaah an vannei tawk lo a, second half-a rawn lut Inter Milan captain Mauro Icardi pawhin danglamna a thlen thei bik lo. Manchester City striker Sergio Aguero erawh bench lamah hun hman tluantir a ni.

South America ram 10 inel zinga a sang pali hi Russia-ah an zin nghal thei dawn a, pangana hian World Cup khel tur chuan inter-confederation playoff an khelh a ngai dawn. Argentina hian match 15 khelhah point 23 hmuin pangana an ni a, an dinhmun a la him lo hle. Uruguay erawh point 24 hmu tawhin pathumna an ni thung - an inkara point awm zat chu point khat chiah a ni.

Kum 57 mi Sampaoli chuan, "Kan dinhmun ngaihtuah chuan chak ngei ngei kan mamawh a, mahse kan theih miau si loh avangin inenfiahna tur kan nei ngah hle. Kan tan chuan fiahna ṭha tak a ni, team kan indin chho mek a ni a, kan hmabak hun ṭha tlemte kan la neih hi kan hman ṭangkai ngei a ngai dawn a ni," tiin a sawi.

Brazil chak

Kum 2018 World Cup thleng tur Russia tih lohah chuan football khawmpui lian khel tura inpet tling hmasa ber Brazil chuan an result ṭha an chhawm nung zel. Tite naute hian nimin zing khan Barcelona player thar Paulinho leh Liverpool star Philippe Coutinho te goal hmangin an mikhual Ecuador chu 2-0 in an hneh.

Brazil hian point 36 hmuin anmahni hnaih ber Colombia lakah point 11 zetin hma an hruai fal tawh a, match thum chiah khelh hmabak awm tawh a nih avangin Tite tan player ṭhenkhat enchhin theihna hun a ni tawh ang.

Inkhel dangah Copa America champion Chile chu an mikhual Paraguay lakah si thum faiin an tlawm. Bayern Munich midfielder Arturo Vidal-a'n an mahni lama a tihluh bakah Victor Caceres leh Richard Ortiz ten goal an khung belh bawk. Chile hian point 23 hmuin palina ni mah se an chung chiaha awm Argentina nen an point hmuh zat a inang.

Chile tana match 96 khel tawh Vidal-a'n an chak loh vangin hrehawm a ti a, an lama a tih goal palh vanga sawiselna a tawn nghal avangin chawl thut thei a nih thu a sawi. Instagram-ah Vidal chuan, "Min lawm lotute lungngaihna chu a reh thuai ang, ka chawlh hun tur a hla tawh lo ang," tiin a sawi.