Number 1 Pliskova a chak hram

World number 1 Karolina Pliskova chuan US Open second round paltlang turin fiahna hautak a paltlang. Ningani zan khan seeded pakhatna Pliskova hian set a hloh zet hnuah tualchhung nula Nicole Gibbs chu 2-6, 6-3, 6-4 in a hneh.

Czech Republic nula hian season hmasa khan US Open final a lut a, nomawi inchuhna inkhelah a chak lo. Tun season-ah pawh final vawi nga khel tawh mah se a chak lo zawkah a ṭang zel - tun ṭumah hian beiseina a nei sang ve hle a ni.

Kum 25 mi Pliskova chuan, "Set hnihnaah ka insiam ṭha a, a tawp thlenga ka talbuai lo chhunzawm kha a lawmawm hle a ni. Third round luh hi thil awlsam a ni lo a, hmabak la tam hle nachungin ka thlen chinah ka lawm," tiin a sawi. Zaninah Chinese nula Zhang Shuai emaw Japan star Risa Ozaki inkhela chak zawk nen an inhmachhawn zui leh nghal ang.

Inkhel dangah kum 2004 US Open champion Svetlana Kuznet­sova chuan world number 1 nih leh theihna hun ṭha a neih chu a bawh pelh. A banrek na vanga buaina a neih vangin seeded pariatna Kuznetsova hi Kurumi Nara lakah 6-3, 3-6, 6-3 in a chak lo.

French Open champion Jelena Ostapenko pawhin Grand Slam inlan huanga a chetṭhat a chhawm nung zel. Latvian nula hi tun ṭumah hian seeded 12-na a ni phak a, third round lut tur hian Romanian star Sorana Cirstea chu 6-4 6-4 in a hneh a ni.