Nadal leh Federer inhnaih zel

Season khat chhunga Grand Slam hnuhnung ber US Open-ah Rafael Nadal leh Roger Federer ten fourth round an lut ta, player ropui pahnih te hi an chak zel a nih chuan semifinal-ah an inhmachhawn ang.

Inrinni zan khan Flushing Meadows, New York-ah see­ded pakhatna Nadal a inlan. Arthur Ashe Stadium chhunga inkhelah Spain star Nadal-a'n Argentina tlangval Leonardo Mayer lakah set hmasa ber hloh mah se darkar thum leh minute 16 an inkhelh hnuah 6-7 (3-7), 6-3, 6-1, 6-4 in hnehna a chang.

Kum 31 mi Nadal hian break point a hmuh hmasa 12 zet a chhawr ṭangkai thei lo a, a vawi 13-naah world num­ber 59 Mayer-aservice hi chhuhsakin vawi nga dang a chhuhsak zui thei a, set hmasa ber bakah a service a hloh loh bawk avangin harsa lutuk loin hnehna a chang thei - zanin dar 8:30-ah Alexandr Dolgopolov nen an inkhel zui leh ang.

World number 1 Nadal chuan, "Inkhel zawng zawng hi a harsa em em vek a, a service vawi khat chhuhsak tur khan ka thawkrim em em a ni. Inelna lianah chuan player khelh hautak deuh hlir kan hmachhawn avangin Dolgopolov nena kan inkhelh turah ka rilru ka sawr bing leh nghal, inelna a zawh hma chuan chawlhsan hman a ni lo," tiin a sawi.

Grand Slam vawi 15 cham­pion tawh Nadal hian kuminah a vawi 10 nan French Open nomawi a chawi a, Flu­shing Meadows bikah hian a cham­pion leh a nih chuan a vawi thum nomawi chawina tur a ni ang.

Roger tak tak
Open Era bika mipa player zinga Grand Slam chawi hnem ber Federer-a'n player ṭha bik a nih zia a lantir leh ta. Nimin zing khan kum 35 mi Federer hian Feliciano Lopez chu 6-3, 6-3, 7-5 a hnehin third round a paltlang.

Grand Slam vawi 19 champion tawh Federer hian a match hmasa pahnihah set nga a khel a, major tournament first leh second round-a set nga khelh nghal tun hma lama a la tawn ngai loh a ni. Spain tlangval Lopez nen pawh inkhel tawk leh hle tura ngaih ni mah se Swiss star hian attacking game hmuhnawm lantiriin a hun tak zelah a khingpui service a chhuhsak thei a, darkar khat leh minute 46 chhung lekin hnehna a chang.

US Open vawi nga cham­pion tawh Federer chuan, "A zawna match hnih set nga ka khelh hnuah straight set hmanga ka chak hi ka lawm hle. Ka khingpuite an rawn tlan hma tam ve hian point ka hloh hnem ṭhin a, tun ṭumah erawh ka duhdan taka ka khelh theih avangin thil a awlsam a ni," a ti.

Federer hian Lopez lakah hian unforced errors vawi 16 chiah a nei a, a khingpui service vawi nga a chhuhsak theih laiin a service vawi khat chiah a hloh thung - zaninah Germany tlangval Philipp Kohlschreiber nen an inkhel leh ang.

Inkhel dang
Tennis tournament zinga sum tamna ber US Open third round inkhel dangah 2009 champion Juan Martin del Potro chuan Roberto Bautista Agut 6-3, 6-3, 6-4 in a hneh a, seeded parukna Dominic Thiem nen an inkhel leh ang. Nimina kum 24 tling hlim Thiem hian Adrian Mannarino 7-5, 6-3, 6-4 in a hneh ve bawk.

Kum 2014 US Open cham­pion Ma­rin Cilic tan erawh round sang zawk luh beiseina a tawp. Wimbledon finalist Cilic hi Diego Schwartzman lakah 4-6, 7-5, 7-5, 6-4 in a chak lo. World num­ber 33 Schwartzman hian a vawi khat nan Grand Slam inelnabikah third round a lut ve ta.

Inkhel Thlirna Tawi
Nadal Stats Mayer
4 Aces 12
3 Double Faults 5
74/109 (68%) First Serve % In 95/151 (63%)
19/23 (83%) Net Points Won 20/38 (53%)
6/25 (24%) Break Points Won 1/3 (33%)
39 Winners 45
26 Unforced Errors 52
140 Total Points Won 120
8911.4 Distance Covered 8658.7
* US Open hi zan dar 8:00 aṭangin Star Sports Select 1-ah an live ang.
* Inkhel hun hi a khel hmasa ten hun an hman rei dan a zirin an tidanglam ṭhin bawk.